சென்னையில் இருந்து 23ம்தேதி கிளம்புகிறார் | Stalin Foreign Trip | DMK | TN CM

2022ம் ஆண்டு மார்ச் மாத இறுதியில் 4 நாள் பயணமாக துபாய், அபுதாபிக்கு முதல்வர் ஸ்டாலின் பயணம் மேற்கொண்டார். இந்தப் பயணம் வெற்றிகரமாக அமைந்தது. 6 தொழில் நிறுவனங்களோடு ரூ.6100 கோடிக்கு புரிந்துணர்வு ஒப்பந்தங்கள் கையெழுத்தானது; இதன்மூலம் தமிழகத்தில் 14,700 பேருக்கு வேலைவாய்ப்பு கிடைக்கும் என சென்னை திரும்பியதும் ஸ்டாலின் கூறினார். தமிழகத்துக்கு மேலும் முதலீடுகளை ஈர்க்க ஸ்டாலின் மீண்டும் வெளிநாடு செல்ல உள்ளதாக கடந்த மாத இறுதியில் தகவல் வெளியானது. ஆனால் தேதி உறுதி செய்யப்படாமல் இருந்தது. வரும் 23ம்தேதி முதல் ஜூன் 2ம்தேதி வரை ஜப்பான், சிங்கப்பூர், மலேசியா ஆகிய நாடுகளில் ஸ்டாலின் சுற்றுப்பயணம் செய்யவிருப்பதாகவும், அதற்கு மத்திய அரசு அனுமதி வழங்கியுள்ளதாகவும் டில்லி வட்டாரங்கள் தெரிவித்தன. 3 நாடுகளிலும் முக்கிய தொழிலதிபர்கள், அரசு அதிகாரிகளுடன் பேச்சு வார்த்தை நடத்தி முதலீடுகளை ஈர்க்க ஸ்டாலின் திட்டமிட்டுள்ளார்.