மாநகராட்சி, கோயில் நிர்வாகம் ஈகோவால் பக்தர்கள் அவதி

மதுரை மீனாட்சி அம்மன் கோயிலுக்கு தினமும் ஆயிரக்கணக்கான பக்தர்கள் வருகின்றனர். பக்தர்கள் நலன் கருதி சித்திரை வீதிகளில் 4 இ டாய்லெட்டுகள் அமைக்கப்பட்டன. மின் கட்டணத்தை கோயில் நிர்வாகம் செலுத்தாததால் இ டாய்லெட்டுகளுக்கான மின் இணைப்பு துண்டிக்கப்பட்டது. கழிவறைகளை பராமரிக்க வேண்டியது மாநகராட்சிதான்; அவர்களே மின் கட்டணத்தை செலுத்தட்டும் என கோயில் தரப்பு சொல்கிறது. கழிவறைகளை கோயில் நிர்வாகத்திடம் ஒப்படைத்துவிட்டோம்; இனி அவர்கள் பொறுப்புதான் என மாநகராட்சி தரப்பு கூறுகிறது. இதனால், 3 மாதமாக இ டாய்லெட்டுகள் செயல்படாமல் வீணாகி வருகிறது. பக்தர்கள் கடும் சிரமத்திற்கு ஆளாகின்றனர். நிதி அமைச்சர் தியாகராஜன் தொகுதிக்கு உட்பட்ட மீனாட்சி அம்மன் கோயிலில் இ டாய்லெட்டுகள் செயல்படாமல் இருக்கலாமா? அமைச்சர் உடனே நடவடிக்கை எடுக்க வேண்டும் என பக்தர்கள் வலியுறுத்துகின்றனர்.