Advertisement

பெண்கள் ஓட்டினால் விபத்துகளை குறைக்கலாம்!

தமிழகத்தின், இரண்டாவது பெண் பஸ் டிரைவராக பணிபுரிந்து ஓய்வு பெற்ற, கன்னியாகுமரி மாவட்டம், புத்தன்கடையை சேர்ந்த, புஷ்பம்:- சிறு வயதிலேயே, பள்ளி விளையாட்டுகளில் அதிகமாக கலந்து, நிறைய சான்றிதழ்கள் வாங்கியுள்ளேன். விமானம் ஓட்ட வேண்டும் என்பது, சிறு வயது ஆசை. சாதாரண விவசாயக் கூலியான அப்பாவால், 10ம் வகுப்புக்கு மேல் படிக்க வைக்க முடியாமல், திருமணம் செய்து கொடுத்தார். கணவர், ராணுவத்தில் வேலை பார்த்தார். நாங்கள், நீலகிரியில் இருந்த போது, பெண்கள் கார் ஓட்டுவதை பார்த்து, 'உன்னால் கார் ஓட்ட முடியுமா?' என, கணவர் கேட்டார். அதையே சவாலாக எடுத்து, கார் ஓட்டக் கற்றுக் கொண்டேன்.

ஊர் திரும்பியதும், தமிழகத்தின் முதல் பெண் டிரைவரான வசந்தகுமாரிக்கு பயிற்சி கொடுத்த, ஓட்டுனர் பள்ளியில் சேர்ந்தேன். சைக்கிள், கார், லாரி, பஸ் என, கனரக வாகனங்கள் ஓட்ட கற்று, அதற்கான லைசென்சும், 1994-ல் எடுத்தேன். வசந்தகுமாரியை போல, எனக்கும் பஸ் டிரைவராக வேண்டும் என்ற ஆசை வந்து, வேலைவாய்ப்பு அலுவலகத்தில் பதிவு செய்தேன். அடுத்த மூன்றாண்டில், அரசு போக்குவரத்துக் கழகத்தில், டிரைவர் வேலை கிடைத்தது. நாகர்கோவில், திருவனந்தபுரம், களியக்காவிளை என, பல, 'டிப்போ, ரூட்'களில், டிரைவராக வேலை பார்த்தேன். வேலைக்கு சேர்ந்த புதிதில், கொஞ்சம் சிரமமாகதான் இருந்தது; பின் பழகிவிட்டது.

ஒருசமயம், நாகர்கோவிலிலேருந்து திருவனந்தபுரம் வழித்தடத்தில் சென்ற போது, பாறசாலை எனும் இடத்தில், சில மலையாள டாக்சிக்காரர்கள், என்னை, 'ஏய் பாண்டிக்காரி'ன்னு கூப்பிட்டு, மோசமாக திட்டினர். போக்குவரத்து நெரிசல் நேரத்திலும், வண்டியை நிறுத்தி இறங்கி, 'பாண்டிக்காரி' என அழைத்த டாக்சி டிரைவரின் கன்னத்தில், ஒரு அறை கொடுத்து விட்டு, பஸ்சில் ஏறினேன். மறுநாள், போலீஸ் ஸ்டேஷன் போய், என்னை கிண்டல் பண்ணியதாக புகார் செய்தேன். உடனே இன்ஸ்பெக்டர், அங்கிருந்த, 14 டாக்சி டிரைவரின் லைசென்சை வாங்கி, 15 நாள் வைத்திருந்து, சம்பந்தப்பட்டவர்கள் வந்து மன்னிப்பு கேட்டவுடன், திருப்பிக் கொடுத்தார்.

ஆண்டவன் புண்ணியத்தில், பெரிய அளவில் விபத்துகள் எதுவும் நடக்காமல் ஓட்டியதால், விருது கொடுத்து கவுரவித்தனர். பெண்கள், பஸ் ஓட்ட முன்வர வேண்டும். இப்போது, ரயில், விமானம் ஓட்டுவது என, பெண்கள் பல துறைகளில் முன்னேறி இருப்பதை பார்க்கும் போது சந்தோஷமாக உள்ளது. பெண்களைப் பொறுத்தவரைக்கும், அவர்களுக்கு பொறுமையும், சமயோசித புத்தியும் ரொம்ப அதிகம்! அதனால் அவர்களால் கனரக வாகனங்களை விபத்தில்லாமல், திறமையாக ஓட்ட முடியும். வாகனம் ஓட்டும் பயிற்சியை கற்க விரும்பும் பெண்களுக்கு, என் மாருதி காரிலேயே கற்றுக் கொடுக்கிறேன். இதனால் பொழுதும் போகிறது; வருமானத்துக்கும் வருமானமும் கிடைக்கிறது.

Download for free from the Store »

Advertisement
 

வாசகர் கருத்து (2)

  • MaRan - chennai,இந்தியா

    நீங்கள் எங்கே கற்றுக்கொடுக்கிறீர்கள் அம்மா,,

  • Srinivasan Kannaiya - muscat ,ஓமன்

    ஆனால் எதிரே வருபவன் உங்களை பார்த்துக் கொண்டே ஓட்டினால் விபத்து வருமே அம்மா

கருத்தைப் பதிவு செய்ய

Advertisement