11 ஆயிரம் கனஅடி தண்ணீரையும் தருவார்கள்: துரைமுருகன் நம்பிக்கை

சென்னை: உச்சநீதிமன்ற தீர்ப்புப்படி கர்நாடகா சார்பில் தமிழகத்திற்கு தரவேண்டிய தண்ணீரில் இன்னும் 11 ஆயிரம் கனஅடி தண்ணீர் தர வேண்டி இருப்பதாகவும், நிலுவையில் உள்ள தண்ணீரையும் கர்நாடக அரசு திறக்கும் என நம்புவதாகவும் தமிழக நீர்வளத்துறை அமைச்சர் துரைமுருகன் தெரிவித்தார்.
காவிரியில் இருந்து தமிழகத்திற்கு 15 நாட்களுக்கு 5 ஆயிரம் கனஅடி வீதம் தண்ணீர் திறந்துவிட வேண்டும் என உச்சநீமன்றம் தீர்ப்பளித்தது. ஆனால் தண்ணீர் திறந்துவிட எதிர்ப்பு தெரிவித்து கர்நாடகாவில் பல அமைப்புகள் சார்பில் இன்று (செப்.,26) 'பந்த்' அறிவிக்கப்பட்டது. அம்மாநில தலைநகர் பெங்களூருவில் போக்குவரத்து பாதிக்கப்பட்டது. விவசாய சங்கங்கள் போராட்டத்தில் ஈடுபட்டுள்ளன. இது குறித்து தமிழக நீர்வளத்துறை அமைச்சர் துரைமுருகன் செய்தியாளர்களிடம் கூறியதாவது:
உச்சநீதிமன்றத்தின் தீர்ப்பையே கடைசி தீர்ப்பாக எடுத்துக் கொள்ள வேண்டும். அதனை எதிர்த்து போராட்டம் நடத்தினால், உச்சநீதிமன்றத்தின் தனித்தன்மை என்னவாகும்? தமிழகத்திற்கு காவிரியில் விநாடிக்கு 5 ஆயிரம் கன அடி தண்ணீர் திறக்க உச்சநீதிமன்றம் உத்தரவிட்டது. இதனை எதிர்த்து அங்கு போராட்டம், ஆர்ப்பாட்டம் நடந்தாலும், தண்ணீர் வந்து கொண்டிருக்கிறது. இன்று காலை நிலவரப்படி காவிரியில் விநாடிக்கு 7 ஆயிரம் கனஅடி வீதம் தண்ணீர் வந்து கொண்டிருக்கிறது. இன்னும் 11 ஆயிரம் கன அடி தண்ணீர் தர வேண்டி இருக்கிறது. நிலுவையில் உள்ள தண்ணீரையும் கர்நாடக அரசு திறக்கும் என நம்புகிறோம். இவ்வாறு அவர் கூறினார்.