மகளிர் இட ஒதுக்கீட்டை அமல்படுத்துவதில் தாமதம்: ராகுல் கண்டனம்

புதுடில்லி: மகளிர் இட ஒதுக்கீட்டை அமல்படுத்துவதில் தாமதம் செய்வதற்கு கண்டனம் தெரிவிப்பதாக கூறியுள்ள காங்கிரஸ் எம்.பி., ராகுல், சாதி வாரி கணக்கெடுப்பு கோரிக்கையை திசை திருப்பவே மத்திய அரசு அவ்வாறு செய்வதாக கூறியுள்ளார்.
புதுடில்லியில் காங்கிரஸ் அலுவலகத்தில் நிருபர்களை சந்தித்த ராகுல் கூறியதாவது: மகளிர் இட ஒதுக்கீடு மசோதா சிறப்பு வாய்ந்தது. ஆனால், மக்கள் தொகை கணக்கெடுப்பு மற்றும் தொகுதி மறுவரையறை தேவை என்ற செய்தி எங்களுக்கு கிடைத்துள்ளது. இதற்கு சில காலமாகும். உண்மையில் இந்த மசோதா உடனடியாக அமல்படுத்த வேண்டும். இது சிக்கலான விஷயம் இல்லை. ஆனால், அரசு அதனை செய்ய விரும்பவில்லை.

நாட்டு மக்கள் முன் மசோதாவை சமர்ப்பித்த அரசு, அதனை அமல்படுத்த 10 ஆண்டுகள் ஆகும் எனக்கூறுகிறது. ஆனால், அது அமலாகுமா என யாருக்கும் தெரியாது. சாதிவாரி கணக்கெடுப்பு கோரிக்கையில் இருந்து திசைதிருப்பவே, பெண்கள் இட ஒதுக்கீட்டை மத்திய அரசு தாமதப்படுத்துகிறது.
ஓ.பி.சி., இட ஒதுக்கீட்டில் இருந்து மத்திய அரசு திசைதிருப்புகிறது. ஓ.பி.சி.,க்கள் குறித்து பிரதமர் மோடி தினமும் பேசுகிறார். ஆனால், அவர்களுக்காக செய்தது என்ன? மத்திய அரசு அதிகாரிகளில் 90ல் 3 பேர் மட்டுமே ஒ.பி.சி., பிரிவை சேர்ந்தவர்கள் உள்ளனர். இதற்கு காரணம் என்ன? ஓ.பி.சி., பிரிவினர் புறக்கணிக்கப்படுகின்றனர். சாதி வாரி கணக்கெடுப்பு நடத்த வேண்டும்
மக்கள் தொகை கணக்கெடுப்பு மற்றும் தொகுதி மறுவரையரை ஆகியவற்றை நீக்கிவிட்டு, இட ஒதுக்கீடு மசோதாவை உடனடியாக அமல்படுத்த வேண்டும். சாதி வாரி கணக்கெடுப்பு குறித்து நாங்கள் செய்த விவரங்களை மத்திய அரசு வெளியிட வேண்டும். இவ்வாறு ராகுல் கூறினார்.