பா.ஜ.,வுடன் ரகசிய உறவு இல்லை என்பதை மக்களிடம் சொல்லுங்கள்!

சென்னை:'பா.ஜ., கூட்டணி முறிந்தாலும், ரகசிய உறவு இருப்பதாக, தி.மு.க., கூறி வருகிறது. அது தவறு என்பதை மக்களிடம் எடுத்துக் கூறுங்கள்' என, அ.தி.மு.க., பொதுச் செயலர் பழனிசாமி, கட்சியினருக்கு அறிவுறுத்திய தகவல் வெளியாகி உள்ளது.

அ.தி.மு.க., மாவட்ட பொறுப்பாளர்கள் மற்றும் மாவட்ட செயலர்கள் ஆலோசனைக் கூட்டம், நேற்று மாலை, சென்னையில் பழனிசாமி தலைமையில் நடந்தது. துணை பொதுச் செயலர் கே.பி.முனுசாமி வரவேற்றார். முன்னாள் அமைச்சர் வேலுமணி நன்றி கூறினார். கூட்டத்தில், பழனிசாமி பேசியுள்ளதாவது:

பூத் கமிட்டி அமைக்கும் பணி, பல மாவட்டங்களில் முழுமையாக நிறைவடைந்துள்ளது. சில மாவட்டங்களில், 75 சதவீதப் பணிகள் மட்டுமே நிறைவடைந்துள்ளன. அந்த மாவட்டங்களில், மீதமுள்ள பணியை துரிதப்படுத்த வேண்டும். அனைத்து மாவட்டங்களிலும், இப்பணிகளை டிச., 4க்குள் முடிக்க வேண்டும். அதன்பின், தேர்தல் பணிகளை துவக்க வேண்டும்.

பூத் கமிட்டியில், 45 வயதுக்கு உட்பட்டவர்களை நியமிக்க வேண்டும். அடுத்த 10 ஆண்டுகளுக்கு அவர்கள்தான், அப்பதவியில் இருந்து கட்சிப் பணியாற்ற வேண்டும். அவர்கள்தான் கட்சியின் அஸ்திவாரம்.

தவறுகள் கண்டுபிடிக்கப்பட்டால், அதற்கு மாவட்ட செயலர்களே பொறுப்பேற்க வேண்டும். எனவே, கவனமுடன் செயல்படுங்கள்.

பா.ஜ., கூட்டணியில் இருந்து விலகி விட்டோம். ஆனால், நாம் ரகசிய உறவு வைத்துள்ளதாக, தி.மு.க., பிரசாரம் செய்து வருகிறது. இது தவறு என்பதை மக்களிடம் எடுத்துரைக்க வேண்டும்.

பா.ஜ., கூட்டணியில் இருந்து விலகிய பின், சிறுபான்மையின மக்கள் நம்மை நோக்கி வருகின்றனர். அவர்களுக்கு கட்சியில் வாய்ப்பு கொடுங்கள்.

தி.மு.க., அரசு மீது மக்களுக்கு அதிருப்தி உள்ளது. அதை நாம் பயன்படுத்திக் கொள்ள வேண்டும். கடந்த முறை பலவீனமாக இருந்த, சென்னை, காஞ்சிபுரம், திருவள்ளூர், செங்கல்பட்டு போன்ற மாவட்டங்களில், கூடுதல் கவனம் செலுத்த வேண்டும்.

இவ்வாறு அவர் பேசியுள்ளார்.