காற்று மாசு : டில்லி, பஞ்சாப் அரசுகளுக்கு சுப்ரீம் கோர்ட் கடும் கண்டனம்

புதுடில்லி :புதுடில்லியின் காற்று மாசு பிரச்னை தொடர்பான வழக்கில், புதுடில்லி மற்றும் பஞ்சாபில் ஆளும் ஆம் ஆத்மி அரசுகளுக்கு, உச்ச நீதிமன்றம் கடும் கண்டனம் தெரிவித்துள்ளது. விவசாயிகளை வில்லனாக்குவதுடன், உங்களுடைய கடமையை செய்யவில்லை என, கடுமையுடன் குறிப்பிட்டுள்ளது.

புதுடில்லியில் முதல்வர் அரவிந்த் கெஜ்ரிவால் தலைமையில் ஆம் ஆத்மி ஆட்சி நடக்கிறது.

இதையொட்டியுள்ள பஞ்சாபில், முதல்வர் பகவந்த் மான் தலைமையில் ஆம் ஆத்மி ஆட்சி அமைந்துள்ளது.

நடவடிக்கை

தலைநகர் புதுடில்லியில் காற்று மாசு பிரச்னை மிகவும் தீவிரமாக உள்ளது. காற்றின் தரம் மிக மிக மோசமான நிலையில் உள்ளது.

காற்று மாசு பிரச்னையை கட்டுப்படுத்த நடவடிக்கை எடுக்க உத்தரவிடக் கோரி, உச்ச நீதிமன்றத்தில் பல வழக்குகள் தொடரப்பட்டுஉள்ளன.

இந்த வழக்கை, நீதிபதிகள் சஞ்சய் கிஷண் கவுல், சுதான்ஷு துலியா அமர்வு விசாரித்து வருகிறது.

பஞ்சாப் உள்ளிட்ட மாநிலங்களில், பயிர் கழிவுகள் எரிக்கப்படுவதே, புதுடில்லியில் மாசு பிரச்னைக்கு முக்கிய காரணமாக கூறப்படுகிறது.

இந்த வழக்கு நேற்று மீண்டும் விசாரணைக்கு வந்தது. அப்போது அமர்வு கூறியுள்ளதாவது:

புதுடில்லியில் காற்றின் தரம் மிகவும் மோசமான நிலையில் உள்ளது. கடந்த ஆறு ஆண்டுகளில் இந்தாண்டு நவ., மாதத்தில் தான் நிலைமை மிகவும் மோசமாக உள்ளது.

காற்று மாசு பிரச்னைக்கு தீர்வு காண்பதுடன், பயிர் கழிவுகள் எரிக்கப்படுவதை தடுக்க வேண்டியது புதுடில்லி மற்றும் பஞ்சாப் அரசுகளின் கடமையாகும். எங்களின் பொறுமையை இதற்கு மேல் சோதிக்க வேண்டாம்.

இதில் அரசியலை பார்க்காமல், மத்திய, மாநில அரசுகள் இணைந்து செயல்பட வேண்டும்.

பஞ்சாபில், பெரும் விவசாயிகள், பயிர் கழிவுகளை இயந்திரங்கள் வாயிலாக, வைக்கோல் பந்துகளாக சுற்றி அதை விற்று வருகின்றனர். விவசாயிகளால் செய்ய முடியும்போது, அரசால் செய்ய முடியாதா? விவசாயிகளை வில்லனாக்கி பார்க்காமல், பிரச்னைக்கு தீர்வு என்ன என பார்க்க வேண்டும்.

சிறு விவசாயிகளுக்கு இயந்திரங்களை இலவசமாக கொடுத்தாலும், அதை இயக்குவதற்கான செலவுக்கு வசதி இல்லாத நிலை இருக்கும்.

இதுபோன்ற விவசாயிகளுக்கு உரிய மானியம் அளித்து, பயிர் கழிவுகளை, வைக்கோல் பந்துகளாக மாற்றி, அதை அரசே வாங்கி மாற்று பயனுள்ளதாக ஏன் மாற்றக் கூடாது?

தகுந்த முடிவு

பயிர் கழிவுகளை எரிப்பவர்களை மாநில அரசு ஏற்கனவே அடையாளம் கண்டுள்ளது. எரிப்பதை அவர்கள் நிறுத்தாவிட்டால், குறைந்தபட்ச ஆதரவு விலை கட்டமைப்பில் இருந்து அவர்களை ஏன் நீக்கக் கூடாது.

இது ஆலோசனைதான், இவை குறித்து விவாதித்து, தகுந்த முடிவுகளை மாநில அரசு எடுக்க வேண்டும்.

போக்குவரத்து வாகனங்கள் வெளியிடும் புகையும், காற்று மாசுவுக்கு ஒரு காரணமாகும். ஆனால், புதுடில்லி - மீரட் இடையே மண்டல விரைவு போக்குவரத்து முறையை துவக்குவதற்கு, 415 கோடி ரூபாயை தர முடியவில்லை என, புதுடில்லி அரசு கூறுகிறது.

மாநில அரசு வெளியிடும் விளம்பரங்களை நிறுத்தி, இந்த திட்டத்துக்கு ஏன் நிதி ஒதுக்கக் கூடாது?

இவ்வாறு அமர்வு கூறியுள்ளது.