தனியார் நிறுவனம் மூலம் டிரைவர், கண்டக்டர் பணியிடம் : டெண்டரை ரத்து செய்தது ஐகோர்ட்

சென்னை:போக்குவரத்து கழகத்தில் தனியார் நிறுவனங்கள் மூலம் டிரைவர் மற்றும் கண்டக்டர்களை நியமனம் செய்வது குறித்த டெண்டரை ரத்து செய்து உத்தரவிட்டுள்ளது சென்னை உயர்நீதிமன்றம்.

சென்னை மாநகர போக்குவரத்து கழகத்தில் தனியார் நிறுவனங்கள் மூலம் டிரைவர் மற்றும் கண்டக்டர்களை நியமனம் செய்வது தொடர்பாக கடந்த செப்.,மாதம் டெண்டர் கோரப்பட்டது. இதனை எதிர்த்து தமிழ்நாடு அரசு போக்குவரத்து தொழிலாளர்கள் கூட்டமைப்பு சார்பில் சென்னை உயர்நீதிமன்றத்தில் வழக்கு தொடரப்பட்டது. வழக்கு நீதிபதி ஹேமலதா முன்னிலையில் விசாரணைக்கு வந்தது.

விசாரணையின் போது இந்த விவரம் குறித்து தொழிலாளர் நலத்துறை ஆய்வுக்கு எடுத்து தற்போது உள்ள நிலையே நீடிக்க அறிவுறுத்திய நிலையில் மாநகர போக்குவரத்து கழகம் இந்த டெண்டரை கோரியிருக்க கூடாது என மனுதாரர் தரப்பில் வாதிடப்பட்டது

ஆனால் தொழிலாளர் நலத்துறை ஆணையரின் அறிவுறுத்தலுக்கு எந்த சட்டப்பூர்வ அதிகாரம் இல்லை எனவும், பல ஊழியர்கள் தொடர்ந்து பணிக்கு வராததால் ஏற்படும் பற்றாக்குறையை சமாளிக்க இந்த முடிவு எடுக்கப்பட்டதாக கூறப்பட்டது. மேலும் நிரந்தர ஊழியர்கள் அடிக்கடி வேலை நிறுத்தத்தில் ஈடுபடுவதையும் தடுக்கப்படும்.அரசு தரப்பில் விளக்கம் அளிக்கப்பட்டது.

இரு தரப்பு வாதங்களையும் கேட்ட நீதிபதி தெரிவித்து இருப்பதாவது:

போக்குவரத்து கழகத்தில் தனியார் நிறுவனங்கள் மூலம் டிரைவர் மற்றும் கண்டக்டர்களை நியமனம் செய்வது என்பது அபாயகரமான சோதனை. இது ஊதிய முரண்பாடுக்கு வழிவகுக்கும். இட ஒதுக்கீடு முறை பின்பற்றப்படாது. தனியார் நிறுவனங்கள் மூலம் டிரைவர்கள் நியமித்தால் விபத்து ஏற்படும் போது இழப்பீடு வழங்குவதில் சிக்கல்கள் ஏற்படும். மேலும் மாநகர போக்குவரத்து கழகம் மட்டுமல்லாது அனைத்து அரசு போக்குவரத்து கழகத்திலும் காலியாக உள்ள டிரைவர், கண்டக்டர், மற்றும் தொழில்நுட்ப வல்லுநர்கள் காலி பணியிடங்களை நேரடி தேர்வு மூலம் நிரப்ப வேண்டும். இவ்வாறு தனது தீர்ப்பில் தெரிவித்து உள்ளார்.