பா.ம.க., ஆட்சிக்கு வருவது எப்போது?

பா.ம.க., நிறுவனர் ராமதாஸ் அறிக்கை:

சமூக நீதியின் தாய் என, மார்தட்டும் தமிழகத்தின் வயிறு வாடிக் கொண்டிருக்கிறது; அதன் கருப்பையோ காய்ந்து கொண்டிருக்கிறது. இதற்கு காரணமான ஆட்சி யாளர்களுக்கோ கவலை இல்லை. தமிழகம் என்ற தொட்டிலில் சமூக நீதியாவது இருக்கிறதா என, எட்டிப்பார்த்தேன்; அது ஆடாமல் காலியாக கிடந்தது. இரும்புக் கட்டில் என்பதால் ஆட மறுக்கிறதோ என, ஆட்டிப் பார்த்தேன். அந்த தொட்டில் துருப்பிடித்து கிடந்தது.

ம.தி.மு.க., தலைமை நிலைய செயலர் துரை வைகோ அறிக்கை:

தமிழக மீனவர் நலன்களை பாதுகாப்பது மத்திய அரசின் கடமை. பேச்சு பலனிளிக்கவில்லை என்றால், இந்திய கடற்பகுதியில் எல்லை தாண்டி வரும் இலங்கை கடற்படையினரையும், கடற் கொள்ளையர்களையும் மத்திய அரசு பாராபட்சமின்றி சுட்டு வீழ்த்த வேண்டும். அப்போது தான் இந்தியாவின் மீது இலங்கை அரசுக்கு பயம் வரும். தமிழக மீனவர்கள் தாக்குதலுக்கும், கைது நடவடிக்கைகளுக்கும் உள்ளாவது இதுவே கடைசி முறையாக இருக்க வேண்டும்.

அனைத்து மக்கள் அரசியல் கட்சி தலைவர் ராஜேஸ்வரி பிரியா அறிக்கை: மணல் கொள்ளையர்களுக்கு மகுடம் சூட்டுவதும், மக்கள் வரி பணத்தை கொள்ளை அடிப்பவர்களுக்கு, பதவி, பட்டம் வழங்குவதும் தான் திராவிட மாடலா? அமலாக்க துறையால் விசாரிக்கப்பட்டு வரும் கைதிக்கு, ஜாமின் வாங்க பல்வேறு யுக்திகளை கையாண்டு வரும் தி.மு.க.,வை பார்த்து, மக்கள் கேள்வி கேட்க தயாராகி விட்டனர். உண்மையான விடியலை மக்கள் விரைவில் உங்களுக்கு காட்டுவர்.

தமிழக பா.ஜ., துணை தலைவர் நாராயணன் திருப்பதி அறிக்கை:

சென்னை, குன்றத்துார் அரசு பள்ளி மாணவன் சந்தோஷ், அரசு பஸ் படியில் தொங்கியபடி பயணித்தபோது கீழே விழுந்ததால், கால்கள் நசுங்கி செயலிழந்த நிலையில் அறுவை சிகிச்சை செய்து அகற்றப்பட்டதாக சொல்லப்படுகிறது. மாணவர்களிடம் ஒழுக்கத்தை கொண்டு வர முனைந்த பெண்மணி மீது வழக்கு தொடுத்த, மாநகர போக்குவரத்து கழகம், தற்போதைய சம்பவத்திற்கு டிரைவர், கண்டக்டர் மீது நடவடிக்கை எடுக்குமா அல்லது மாணவன் மீது தான் தவறு என, தப்பிக்க பார்க்குமா?