பிரதமரின் இ - பஸ் திட்டம்; மதுரை உட்பட 11 நகரங்கள் தேர்வு

சென்னை: தமிழகத்தில் கோவை, மதுரை உள்ளிட்ட, 11நகரங்கள், பிரதமரின் இ - பஸ் திட்டத்துக்கு தேர்வு செய்யப்பட்டுள்ளன.

நாடு முழுதும், 100 நகரங்களில், 'ஸ்மார்ட் சிட்டி' திட்டத்தின் கீழ், அடிப்படை கட்டமைப்புகள் மேம்படுத்தும் பணிகள் நடந்து வருகின்றன.

இந்நகரங்கள், இதை ஒட்டிய பகுதிகளில், சுற்றுச்சூழலுக்கு மாசு ஏற்படுத்தாத வகையில், போக்குவரத்து வசதிகளை மேம்படுத்த திட்டமிடப்பட்டது.

தற்போதைய நிலவரப்படி, இரு சக்கர வாகனங்கள் முதல் பஸ்கள் வரை மின்சார வாகனங்கள் வந்துள்ளன. பெட்ரோலிய பொருட்கள் பயன்பாடு மற்றும் மாசு குறைப்புக்கு இது பேருதவியாக உள்ளது.

குறிப்பிட்ட சில தனியார் போக்குவரத்து நிறுவனங்கள் இ - பஸ் சேவையை துவங்கிஉள்ளன. இதற்கு மக்களிடம் நல்ல வரவேற்பு கிடைத்துள்ளது.

இந்நிலையில், 'பிரதமரின் இ - பஸ்' என்ற பெயரில், புதிய திட்டம் உருவாக்கப்பட்டு உள்ளது. நாடு முழுதும், 169 நகரங்களில், 10,000 இ - பஸ்கள் இயக்க, 20,000 கோடி ரூபாயை வழங்க, மத்திய அரசு முடிவு செய்துள்ளது. இத்திட்டத்துக்கான நகரங்கள் தேர்வு பணிகள் முடிந்துள்ளன.

இதுகுறித்து, மத்திய வீட்டுவசதி, நகர்ப்புற விவகாரங்கள் துறை, தமிழகம் உள்ளிட்ட மாநிலங்களுக்கு அனுப்பியுள்ள அறிக்கை:

பிரதமரின் இ - பஸ் திட்டத்தில், தமிழகத்தில், 3 லட்சத்துக்கும் மேலான மக்கள் வசிக்கும் நகரங்கள் தேர்வு செய்யப்பட்டு உள்ளன.

இதன்படி, முதற்கட்டமாக, கோவை, மதுரை, திருச்சி, ஈரோடு, சேலம், திருப்பூர், திருநெல்வேலி, துாத்துக்குடி, வேலுார், ஆவடி, அம்பத்துார் ஆகிய நகரங்கள் தேர்வு செய்யப்பட்டு உள்ளன.

இந்த நகரங்களில் இ - பஸ் திட்டத்தை செயல்படுத்துவதற்கான வழிமுறைகளை தமிழக அரசு அனுப்ப வேண்டும். இ - பஸ் திட்டத்தில், 10 ஆண்டுகளுக்கான செலவுக்கான நிதியையும், மத்திய அரசே வழங்க வாய்ப்புள்ளது. இவ்வாறு, அதில் குறிப்பிடப்பட்டு உள்ளது.

இதன்படி, தமிழகத்தில் இத்திட்டத்தை செயல்படுத்துவது குறித்த முடிவை, தமிழக அரசு விரைவில் தெரிவிக்கும் என்று எதிர்பார்க்கப்படுகிறது.