நியூஸ்கிளிக் இணைய ஊடகத்தின் நிறுவனர் கைது! சீனாவுக்கு ஆதரவாக இயங்கியதாக புகார்

புதுடில்லி: சீனாவுக்கு ஆதரவாக பிரசாரம் செய்து வந்ததாக குற்றம் சாட்டப்பட்டுள்ள, 'நியூஸ்கிளிக்' இணைய ஊடகத்தின் நிறுவனரும், பத்திரிகையாளருமான பிரபிர் புர்கயஸ்தா உட்பட இருவரை, புதுடில்லி சிறப்பு பிரிவு போலீசார் நேற்று கைது செய்தனர். மேலும், அந்நிறுவனத்தின் அலுவலகத்துக்கும், போலீசார் 'சீல்' வைத்தனர்.

புதுடில்லியை தலைமையிடமாக வைத்து செயல்படுகிறது, நியூஸ்கிளிக் இணைய ஊடக நிறுவனம். அமெரிக்காவைச் சேர்ந்த, 'நியூயார்க் டைம்ஸ்' நாளிதழ் சமீபத்தில் ஒரு ஆய்வு கட்டுரையை வெளியிட்டிருந்தது.


அதில், இந்தியாவில் சீனாவுக்கு ஆதரவாக பிரசாரம் செய்ய, இந்த இணைய ஊடகத்துக்கு, அமெரிக்க தொழிலதிபர் நெவில் ராய் சிங்கம் பெருந் தொகை கொடுத்துள்ள தாகக் கூறப்பட்டுள்ளது.


இதையடுத்து, இந்த விவகாரம் தொடர்பாக அமலாக்கத் துறை அதிகாரிகள், இந்த நிறுவனத்தின் அலுவலகம் உள்ளிட்ட இடங்களில் சோதனை மேற்கொண்டனர். இந்த நிறுவனம், சீனாவுக்கு ஆதரவாகவும், நம் நாட்டுக்கு எதிராகவும் செயல்படுவதாக, புதுடில்லி போலீசின் சிறப்பு பிரிவு, கடந்த ஆக., 17ல் வழக்குப் பதிவு செய்திருந்தது.

மிகவும் கடுமையான, சட்டவிரோத நடவடிக்கைகள் தடுப்பு சட்டம் மற்றும் இந்திய தண்டனை சட்டத்தின் பிரிவுகளின் கீழ் இந்த வழக்குகள் பதிவு செய்யப்பட்டுள்ளன.


நாட்டுக்கு எதிராகச் செயல்படுவது, மத ரீதியில் மோதல்களை ஏற்படுத்துவது, கூட்டுச் சதி உள்ளிட்ட பிரிவுகளின் கீழ் இந்த வழக்குகள் பதிவு செய்யப்பட்டுள்ளன.

இந்நிலையில், இந்த ஊடக நிறுவனத்தின் அலுவலகம் மற்றும் அதில் பணியாற்றும் பத்திரிகையாளர்களின் வீடு உட்பட 30 இடங்களில், புதுடில்லி போலீஸ் அதிகாரிகள் நேற்று அதிரடி சோதனையில் ஈடுபட்டனர்.


இந்த நிறுவனத்துடன் தொடர்புடைய பத்திரிகையாளர்களின் லேப்டாப், மொபைல் போன் உள்ளிட்டவை பறிமுதல் செய்யப்பட்டன. அவற்றில் இருந்து நீக்கப்பட்ட ஆவணங்கள் மீட்கப்பட்டு உள்ளதாகக் கூறப்படுகிறது.

இந்த சோதனைகளுக்கு இடையே, அந்த நிறுவனத்தில் பணியாற்றும், ஒன்பது பெண்கள் உட்பட 46 பேரிடம் புதுடில்லி போலீசார் விசாரணை நடத்தினர்.

இதை தொடர்ந்து 'நியூஸ்கிளிக்' இணைய ஊடகத்தின் நிறுவனரும், பத்திரிகையாளருமான பிரபிர் புர்கயஸ்தா மற்றும் அந்நிறுவனத்தின் மேலாளர் அமித் சக்ரவர்த்தி ஆகியோரை பயங்கரவாத தடுப்பு சட்டத்தின் கீழ், புதுடில்லி சிறப்பு பிரிவு போலீசார் நேற்று கைது செய்தனர்.

மேலும், புதுடில்லியில் உள்ள அந்நிறுவனத்தின் அலுவலகத்துக்கும், போலீசார் 'சீல்' வைத்தனர்.

வெளிநாடுகளில் இருந்து சட்டவிரோதமாக பணம் பெற்றதாக, நியூஸ்கிளிக் நிறுவனர் மற்றும் முதன்மை ஆசிரியரான பிரபிர் புர்கயஸ்தா மீது ஏற்கனவே வழக்கு உள்ளது.