‛லிப்ஸ்டிக், பாப் கட்டிங் பெண்களே முன்னேறுவர்: மகளிர் இட ஒதுக்கீடு பற்றி லாலு கட்சி எம்.பி., சர்ச்சை பேச்சு

பாட்னா: ‛‛ மத்திய அரசு கொண்டு வந்துள்ள மகளிர் இட ஒதுக்கீடு சட்டத்தால், லிப்ஸ்டிக் பூசிய மற்றும் பாப் கட்டிங் செய்த பெண்களே முன்னுக்கு வருவார்கள் '' என லாலு தலைமையிலான ராஷ்ட்ரீய ஜனதா தள கட்சி எம்.பி., அப்துல் பாரி சித்திக் கூறியது சர்ச்சையை ஏற்படுத்தி உள்ளது.

பார்லிமென்ட் மற்றும் மாநில சட்டசபைகளில் பெண்களுக்கு 33 சதவீத இட ஒதுக்கீடு அளிக்கும் மசோதா சமீபத்தில் பார்லிமென்டில் நிறைவேறியது. இந்த மசோதாவுக்கு நேற்று ( செப்.,29) ஜனாதிபதி திரவுபதி முர்மு ஒப்புதல் அளித்ததைத் தொடர்ந்து அதனை அரசிதழில் மத்திய அரசு வெளியிட்டது.

இந்நிலையில் முசாபர்பூரில் நடந்த நிகழ்ச்சி ஒன்றில் அப்துல் பாரி சித்திக் பேசியதாவது: மகளிர் இட ஒதுக்கீடு என்ற பெயரில், லிப்ஸ்டிக் மற்றும் பாப் கட்டிங் செய்த பெண்களே முன்னேறுவார்கள். பிற்படுத்தப்பட்ட சமுதாயத்தைச் சேர்ந்த பெண்களுக்கும் மத்திய அரசு இட ஒதுக்கீடு அளிக்க வேண்டும்.

உங்கள் மூளையை பயன்படுத்தாமல், டிவி நிகழ்ச்சிகளை பார்ப்பதையும், சமூக வலைதளங்களில் நேரத்தை பயன்படுத்துவதையும் நிறுத்த வேண்டும். இவ்வாறு அவர் பேசினார். இவரது பேச்சு சர்ச்சையை ஏற்படுத்தி உள்ளது.