அ.தி.மு.க., - -பா.ஜ., கூட்டணி மீண்டும் மலருமா?

அ.தி.மு.க., - பா.ஜ., கூட்டணி முறிந்து விட்டதாக, கடந்த 25ல், அ.தி.மு.க., துணைப் பொதுச் செயலர் கே.பி.முனுசாமி அறிவித்தார். இருந்த போதும், மீண்டும் கூட்டணியை மலர வைக்கும் முயற்சிகள் எடுக்கப்படுகின்றன.

இதற்காக, தமிழக பா.ஜ., தலைவர் அண்ணாமலையிடம் டில்லி மேலிட தலைவர்கள், 'கூட்டணி குறித்து எதுவும் பேச வேண்டாம்' என, அறிவுறுத்தினர். இதையடுத்து, தமிழக பா.ஜ., தலைவர்கள் எதுவும் பேசாமல் அமைதி காத்து வருகின்றனர். இந்நிலையில், இரு கட்சிகளுக்கும் இடையே விழுந்த விரிசலை சரி செய்யும் முயற்சியில், அ.தி.மு.க., பிரமுகர் ஒருவரும், பா.ஜ., பிரமுகர் ஒருவரும் கடுமையாக முயற்சித்து வருவதாக தகவல் பரவுகிறது.


அந்த இருவர் வாயிலாக, நேரடியாக களம் இறங்கி இருப்பவர் பா.ஜ.,வைச் சேர்ந்த அசாம் மாநில முதல்வர் ஹிமந்த பிஸ்வ சர்மா. பா.ஜ., மேலிட ஆசியுடன் அவர் செயல்பட்டு வருகிறார்.
சமீபத்தில், இவர் தமிழகம் வந்து வேலுாரில் கட்டப்பட்டுள்ள, 'அசாம் பவன்' கட்டடத்தை திறந்து வைத்தார். பின், ரகசியமாக தமிழகத்தில் உள்ள முக்கிய நகரத்துக்கு சென்று, அ.தி.மு.க., மற்றும் பா.ஜ., பிரமுகர்கள் இரண்டு பேரை சந்தித்துள்ளார்.
இது குறித்து அரசியல் வட்டாரங்கள் கூறியதாவது:
'அசாம் மாநிலத்தில், 3,000 தமிழக பணியாளர்கள் சாலை, மின்சாரம், கட்டடம் உள்ளிட்ட பல்வேறு கட்டுமான பணிகளை செய்து வருகின்றனர். அவர்கள் அ.தி.மு.க., பிரமுகருக்கு சொந்தமான நிறுவனத்தைச் சேர்ந்தவர்கள்.

அசாம் மாநிலத்தில், பல கோடி ரூபாய் மதிப்புள்ள கட்டுமான பணி ஒப்பந்தங்களை அ.தி.மு.க., பிரமுகர் நிறுவனம் பெற்றுள்ளது. 5 ஆண்டுகளாக இந்த பணிகள் முழு வேகத்தில் நடக்கின்றன. இதற்காக கணிசமான கமிஷன் தொகையும், அசாம் மாநிலத்தில் இருக்கும் முக்கிய பிரமுகர்களுக்கு கொடுக்கப்பட்டு வருகிறது. அங்கிருக்கும் ஆளுங் கட்சியினர் அ.தி.மு.க., பிரமுகரின் நிறுவனத்துடன் நல்ல தொடர்பில் உள்ளனர். இந்த கட்டுமான பணிகளை அ.தி.மு.க., பிரமுகருக்கு வாங்கிக் கொடுத்தது ஒரு பா.ஜ., பிரமுகர்.

இப்போது பா.ஜ., - அ.தி.மு.க., இடையே விரிசல் ஏற்பட்டுள்ள நிலையில், அந்த இரண்டு பிரமுகர்களும் சேர்ந்து, அசாம் மாநில முதல்வர் வாயிலாக டில்லி மேலிடத்திடம் பேசி, மீண்டும் சுமுக நிலை ஏற்பட முயற்சித்து வருகின்றனர். அதற்காகவே, அசாம் முதல்வர் பிஸ்வ சர்மா, களப்பணியாற்றி வருகிறார்.இவ்வாறு அந்த வட்டாரங்கள் கூறின. -நமது நிருபர்-