பா.ஜ., அ.தி.மு.க., கூட்டணி முறிவு

சென்னை : பா.ஜ.,வுடனான கூட்டணி முறிந்து விட்டதாக. அ.தி.மு.க., திட்டவட்டமாக அறிவித்துள்ளது. சென்னையில் நேற்று, மாநில நிர்வாகிகள், மாவட்ட செயலர்கள், எம்.பி., - எம்.எல்.ஏ.,க்களுடன் நடத்திய ஆலோசனைக்குப்பின், இம்முடிவை அ.தி.மு.க., தலைமை எடுத்துள்ளது.

பா.ஜ., தலைமையிலான தேசிய ஜனநாயகக் கூட்டணியில், அதற்கு அடுத்த பெரிய கட்சியாக, அ.தி.மு.க., இருந்தது. இரு கட்சிகளும், 2019 லோக்சபா தேர்தல், 2021 சட்டசபை தேர்தல் ஆகியவற்றை கூட்டாக சந்தித்தன.அதன்பின் நடந்த நகர்ப்புற உள்ளாட்சி தேர்தலில் பிரச்னை ஏற்பட்டது; பா.ஜ., தனித்து போட்டியிட்டது.

ஏமாற்றம்

அதை மறந்து, இரு கட்சிகளும் கூட்டணியில் தொடர்வதாக அறிவித்த போதிலும், உறவு சீராக இல்லை. ஈரோடு தொகுதி இடைத்தேர்தலின்போது, கசப்பு அதிகரித்தது. தமிழக பா.ஜ., தலைவர் அண்ணாமலைக்கும், அ.தி.மு.க., தலைமைக்கும் இடையே, கருத்து வேறுபாடு பெரிதானது.

அதைத் தொடர்ந்து, ஜெயலலிதா, அண்ணாதுரை குறித்து, அண்ணாமலை பேசியதற்கு கண்டனம் தெரிவித்து, பா.ஜ., கூட்டணியில் இருந்து விலகுவதாக, கடந்த 18ம் தேதி, அ.தி.மு.க., சார்பில், முன்னாள் அமைச்சர் ஜெயகுமார் தெரிவித்தார்.

அதன் பின்னும், அ.தி.மு.க., தரப்பில், மத்திய அமைச்சர் அமித் ஷாவை சந்தித்து பேசி, உறவை புதுப்பிக்க முயற்சி எடுக்கப்பட்டது. முன்னாள் அமைச்சர்கள் முனுசாமி, விஸ்வநாதன், வேலுமணி, தங்கமணி ஆகியோர் புதுடில்லி சென்றனர்; ஆனால், அமித் ஷாவை சந்திக்க முடியாமல், ஏமாற்றத்துடன் திரும்பினர்.

அந்த கோபத்தோடு, சென்னையில் நேற்று, மாவட்ட செயலர்கள், மாநில நிர்வாகிகள் கூட்டத்தை, அக்கட்சி பொதுச்செயலர் பழனிசாமி கூட்டியிருந்தார்.

கூட்டம் துவங்கியதும், வரவேற்று பேசிய கே.பி.முனுசாமி, வரலாற்று முக்கியத்துவம் வாய்ந்த தீர்மானம், இன்று நிறைவேற்றப்பட உள்ளதாக தெரிவித்தார். வேலுமணி பேசுகையில், அமித்ஷாவை சந்திக்க முயன்றதையும், பியுஷ் கோயலை சந்தித்த விபரத்தையும் தெரிவித்தார்.

தொடர்ந்து பேசிய தங்கமணி, செங்கோட்டையன், செம்மலை ஆகியோர், தலைமை எடுக்கும் முடிவை ஏற்பதாக தெரிவித்தனர். சி.வி.சண்முகம், 'கூட்டணியில் இருந்து விலகுவது நல்ல முடிவு' என்றார்.

இறுதியாக, பழனிசாமி பேசியதாவது:

உங்கள் முடிவை ஏற்கிறேன். கடந்த உள்ளாட்சி தேர்தலில், தகுதிக்கு மீறி இடம் கேட்டனர். நாம் முடியாது என்றோம். அடுத்து பேச்சுக்கு வந்தவர்கள், 'உங்களிடம் பேச வரவில்லை. நன்றி கூறவே வந்தோம்' என்றனர்.இப்படி தொடர்ந்து, மரியாதை குறைவாக நடந்து கொண்டனர். நமக்கு உரிய மரியாதையை, அவர்கள் அளிக்கவில்லை. நம்மை மதிக்காதவர்களின் கூட்டணியில் நாம் இருக்க வேண்டியதில்லை.

நாம் பா.ஜ., கூட்டணியில் இருப்பதால், நம்மை அடிமை என, ஸ்டாலின் கூறுகிறார். பா.ஜ.,விடம் இருந்து விலகிய பின், என்ன கூறுகிறார் என்று பார்ப்போம்.இவ்வாறு அவர் பேசினார்.

தீர்மானம்

அதையடுத்து, உங்கள் முடிவின்படி தீர்மானம் நிறைவேற்றப்பட்டு உள்ளதாக கூறி, அ.தி.மு.க., கூட்டணியில் இருந்து பா.ஜ.,வை விலக்கும் தீர்மானத்தை படித்தார்.

தீர்மான விபரம்:

தேசிய ஜனநாயகக் கூட்டணியில் உள்ள, பா.ஜ., மாநில தலைமை கடந்த ஓராண்டு காலமாக, திட்டமிட்டு வேண்டுமென்றே உள்நோக்கத்தோடு, அ.தி.மு.க., மீதும், அண்ணாதுரை, ஜெயலலிதா ஆகியோர் மீதும் அவதுாறாகப் பேசி, எங்கள் கொள்கையை விமர்சித்து வருகிறது.

மேலும், பா.ஜ., மாநில தலைமை, கடந்த ஆக., 20ல் மதுரையில் நடந்த, அ.தி.மு.க., பொன்விழா எழுச்சி மாநாடை சிறுமைப்படுத்தியும், 2 கோடிக்கும் மேற்பட்ட தொண்டர்களை வழிநடத்தி வரும், பொதுச்செயலர் பழனிசாமி குறித்து அவதுாறாக விமர்சித்தும் வருகிறது.

இச்செயல், கட்சித் தொண்டர்கள், நிர்வாகிகள் மத்தியில் கொந்தளிப்பை ஏற்படுத்தி உள்ளது. தொண்டர்கள் எண்ணத்திற்கும், விருப்பத்திற்கும், உணர்வு களுக்கும் மதிப்பளித்து, பா.ஜ., கூட்டணியில் இருந்தும், தேசிய ஜனநாயகக் கூட்டணியில் இருந்தும், அ.தி.மு.க., விலகிக் கொள்கிறது.இவ்வாறு அதில் கூறப்பட்டுள்ளது.


இத்தீர்மானத்தை, செய்தியாளர்கள் கூட்டத்தில் படித்த கே.பி.முனுசாமி, ''2024ல் நடக்க உள்ள லோக்சபா தேர்தலில், பழனிசாமி தலைமையில், மற்ற கூட்டணிக் கட்சிகளோடு சேர்ந்து, அ.தி.மு.க., தேர்தலை சந்திக்கும்,'' என்றார்.