நன்றி... மீண்டும் வராதீர்கள் : டிரெண்டாகும் அ.தி.மு.க., டுவீட்...!

கடந்த சில நாட்களாக அதிமுக - பா.ஜ., கூட்டணியில் விரிசல் ஏற்பட்டுள்ளது. தமிழக பா.ஜ., தலைவர் அண்ணாமலையின் அதிமுக., குறித்த விமர்சனங்களுக்கு எதிராக அதிமுக மூத்த தலைவர்கள் விமர்சனங்களை முன்வைத்து வருகின்றனர். பா.ஜ.,வுடன் கூட்டணி இல்லை என முன்னாள் அமைச்சர் ஜெயக்குமார் பகிரங்கமாக அறிவித்தார். ஆனால், கட்சி தலைமை இதுவரை அதிகாரப்பூர்வமாக அறிவிக்காமல் இருந்தது. இந்த நிலையில், சென்னை ராயப்பேட்டையில் உள்ள அதிமுக தலைமை அலுவலகத்தில் அக்கட்சியின் பொதுச்செயலாளர் பழனிசாமி தலைமையில் மாவட்ட செயலாளர்கள், நிர்வாகிகள் கூட்டம் இன்று நடைபெற்றது.

இக்கூட்டத்தில், பா.ஜ.,வுடன் கூட்டணி வேண்டாம் என பல நிர்வாகிகள் வலியுறுத்தியதாக கூறப்படுகிறது. மேலும், தேர்தலின்போது கூட்டணி பற்றி பார்த்துக்கொள்ளலாம், இப்போதைக்கு பா.ஜ., வேண்டாம் என ஒருசிலர் கூறியுள்ளதாக தெரிகிறது. பின்னர் பேசிய பழனிசாமி, 'மாவட்ட செயலாளர்களின் கருத்துகள் அடிப்படையில் பா.ஜ., கூட்டணி குறித்து இறுதி முடிவு எடுக்கப்படும்' எனப் பேசியதாக தகவல் வெளியானது.

கூட்டத்தின் முடிவில் செய்தியாளர்களை சந்தித்த கே.பி.முனுசாமி கூறியதாவது: தேசிய ஜனநாயக, கூட்டணியில் உள்ள பா.ஜ.,வின் மாநில தலைமை வேண்டுமென்றே உள்நோக்கத்துடன் அதிமுக மீதும், அண்ணாதுரை, ஜெயலலிதா பற்றி அவதூறாக பேசியும், கொள்கைகளை விமர்சித்தும் வருகிறது. இது கோடிக்கணக்கான தொண்டர்கள் மத்தியில் கொந்தளிப்பை ஏற்படுத்தியுள்ளது.

இன்று நடைபெற்ற மாவட்ட செயலாளர்கள் கூட்டத்தில், 2 கோடி தொண்டர்களின் உணர்வுக்கு மதிப்பளித்து இன்று முதல் தேசிய ஜனநாயக கூட்டணியில் இருந்தும், பா.ஜ., உடனான கூட்டணியில் இருந்தும் விலகி கொள்ள முடிவு செய்துள்ளது. இந்த தீர்மானம் ஏகமனதாக நிறைவேற்றப்பட்டது. 2024 பாராளுமன்ற தேர்தலில் அ.தி.மு.க பொதுச்செயலாளர் எடப்பாடி பழனிசாமி தலைமையில் மற்ற கட்சிகளுடன் கூட்டணி உருவாக்கப்படும். இவ்வாறு அவர் கூறினார்.

மாவட்ட செயலாளர்கள் கூட்டத்திற்கு நடுவே, வெளியே வந்த மாவட்ட செயலாளர் ஆதி ராஜாராம், கூட்டணி இல்லை என சைகை காட்டியபோது, அலுவலகத்தின் வெளியே திரண்டிருந்த தொண்டர்கள் ஆரவாரம் எழுப்பி, பட்டாசு வெடித்தும், இனிப்புகளை வழங்கியும் கொண்டாடினர்.

பாஜ.,வுடன் கூட்டணியில் இல்லை என்று அறிவித்த சில மணி துளிகளில் '#நன்றி...மீண்டும் வராதீர்கள்' என்ற ஹேஷ்டேக் டிவிட்டரில் வைரலாகி வருகிறது. அதிமுக தொண்டர்கள் பாஜ.,வுக்கு எதிராகவும், அ.தி.மு.க ஆதரவாகவும் கருத்துகளை பகிரந்து வருகின்றனர். இந்திய அளவில் பேசும்பொருளாக மாறியுள்ள இந்த விவகாரம் தமிழகத்தில் மட்டுமல்லாமல் பாராளுமன்ற தேர்தலின் போது, பாஜ.,வுக்கு பெரும் பின்னடைவாக இது இருக்கும் என அரசியல் விமர்சகர்கள் கருத்து தெரிவித்து வருகின்றனர்.