ஏலத்தில் கொப்பரை விலை சரிவால் அதிர்ச்சி

ஆனைமலை;ஆனைமலை ஒழுங்கு முறை விற்பனை கூடத்தில் நடந்த, கொப்பரை ஏலத்தில், கிலோவுக்கு, 1.69 ரூபாய் விலை சரிவு ஏற்பட்டது.

ஆனைமலை ஒழுங்குமுறை விற்பனை கூடத்தில், வாரந்தோறும் செவ்வாய் கிழமையில் கொப்பரை ஏலம் நடக்கிறது. அதன்படி, நேற்று கண்காணிப்பாளர் செந்தில்முருகன் தலைமையில், கொப்பரை ஏலம் நடந்தது.

முதல் தர கொப்பரை, 150 மூட்டைகள் ஏலம் விடப்பட்டதில், கிலோவுக்கு, 73.10 ரூபாய் முதல், 77.09 ரூபாய் வரை விலை கிடைத்தது. இரண்டாம் தர கொப்பரை, 247 மூட்டைகள் ஏலம் விடப்பட்டதில் கிலோவுக்கு, 46.69 முதல், 69.63 ரூபாய் வரை விலை கிடைத்தது. மொத்தம், 397 கொப்பரை மூட்டைகளை, 66 விவசாயிகள் கொண்டு வந்தனர். 10 வியாபாரிகள் ஏலத்தில் பங்கேற்றனர்.

கடந்த வாரத்தை விட, 28 மூட்டைகள் வரத்து குறைந்து காணப்பட்டது. கிலோவுக்கு, 1.69 ரூபாய் விலை குறைந்துள்ளது. இதனால், விவசாயிகள் அதிர்ச்சியடைந்தனர். இந்த வாரம், 12.50 லட்சம் ரூபாய் மதிப்பிலான, 178.65 குவிண்டால் கொப்பரை ஏலம் விடப்பட்டது. இத்தகவலை விற்பனை கூட கண்காணிப்பாளர் தெரிவித்தார்.