சிங்கப்பூர் அதிபரானார் தர்மன் சண்முகரத்னம்

ஜூரோங்: சிங்கப்பூரில் நேற்று நடந்த அதிபர் தேர்தலில், தமிழரும், இந்திய வம்சாவளியுமான தர்மன் சண்முகரத்னம் அபார வெற்றி பெற்றார்.

ஆசிய நாடான சிங்கப்பூரின் தற்போதைய அதிபர் ஹலிமாவின் ஆறு ஆண்டு பதவிக்காலம் வரும் 13ம் தேதியுடன் முடிவடைகிறது. இதையடுத்து, புது அதிபரை தேர்ந்தெடுப்பதற்கான தேர்தல் நேற்று விறுவிறுப்பாக நடந்தது.

இதில், இந்திய வம்சாவளியும், தமிழருமான தர்மன் சண்முகரத்னம், 66, சீன வம்சாவளிகளான இங் கொக் செங், 76, டான் கின் லியான், 75, ஆகியோர் போட்டியிட்டனர். காலை 8:00 மணி துவங்கி இரவு 8:00 மணி வரை நடந்த தேர்தலில், 27 லட்சத்துக்கும் அதிகமானோர் தங்கள் ஓட்டை பதிவு செய்தனர்.

இதையடுத்து, நேற்று இரவே ஓட்டுகள் எண்ணப்பட்டு, இரவு 10:00 மணியளவில் இறுதி முடிவு அறிவிக்கப்பட்டது. இதில், தர்மன் சண்முகரத்னம், 70 சதவீத ஓட்டுகள் பெற்று வெற்றி பெற்றதாக அறிவிக்கப்பட்டது. அடுத்ததாக இங் கொக் செங், 15.7 சதவீதமும், டான் கின் லியான் 13.88 சதவீதமும் ஓட்டுகளை பெற்றனர்.

“இந்த வெற்றியின் வாயிலாக வருங்கால வளர்ச்சியை சிங்கப்பூர் மக்கள் தேர்ந்தெடுத்துள்ளனர்,” என தர்மன் சண்முகரத்னம் தெரிவித்துள்ளார்.

நம் அண்டை நாடான இலங்கையை பூர்வீகமாகக் கொண்ட தமிழ் வம்சாவளியைச் சேர்ந்த தர்மன் சண்முகரத்னம், ஏற்கனவே சிங்கப்பூர் துணை பிரதமர், நிதியமைச்சர், கல்வி அமைச்சர் என பல்வேறு பதவிகளை வகித்துள்ளார்.