எங்களுக்கே மழை இல்லை, தண்ணீர் இல்லை : தமிழகத்திற்கு தண்ணீர் திறக்க கர்நாடக முதல்வர் மறுப்பு

பெங்களூரு: 'மிகக்குறைவாகவே மழை பெய்துள்ளதால் கர்நாடகாவில் போதிய அளவில் தண்ணீர் இல்லை. அதனால் தமிழகத்திற்கு தண்ணீர் திறக்க முடியவில்லை' என கர்நாடக முதல்வர் சித்தராமையா தெரிவித்துள்ளார்.

காவிரி நதிநீர் பங்கீட்டில் உள்ள பிரச்னைகளை களைவதற்காக உச்சநீதிமன்ற உத்தரவுப்படி காவிரி மேலாண்மை ஆணையம் அமைக்கப்பட்டது. இந்த ஆணையத்தின் 22வது கூட்டம் புதுடில்லியில் நேற்று (ஆக.,11) நடைபெற்றது. இக்கூட்டத்தில் தமிழகம், புதுச்சேரி, கர்நாடகா, கேரளாவைச் சேர்ந்த அதிகாரிகள் கலந்து கொண்டனர். அப்போது தமிழகத்திற்கு 38 டிஎம்சி தண்ணீரை தர வேண்டும் என்ற தமிழகத்தின் கோரிக்கையை கர்நாடகா ஏற்க மறுத்தது. இதனால் தமிழக அதிகாரிகள் கூட்டத்தில் இருந்து வெளிநடப்பு செய்தனர்.



இதனையடுத்து காவிரி ஆற்றில் இருந்து தமிழகத்திற்கு 38 டி.எம்.சி தண்ணீரை திறந்து விட வேண்டும் என கர்நாடகாவிற்கு காவிரி மேலாண்மை ஆணையம் உத்தரவு பிறப்பித்தது. இது குறித்து தமிழக நீர்வளத்துறை அமைச்சர் துரைமுருகன் கூறுகையில், 'காவிரி விவகாரத்தில் கர்நாடக அரசுடன் பேச்சுவார்த்தை நடத்தும் திட்டமில்லை. நீர் இருப்பு இருந்தும் கர்நாடக அரசு நீர் திறக்கவில்லை. நீர் திறக்க நீதிமன்றமே உத்தரவிட்டுள்ளதால் பேச்சுவார்த்தை நடத்தவில்லை. 15 ஆயிரம் கனஅடி நீர் திறக்க கோரினோம்; மேலாண்மை ஆணையம் 10 ஆயிரம் கனஅடி நீர் திறக்க ஆணையிட்டுள்ளது' என்றார்.


கர்நாடக முதல்வர் சித்தராமையா கூறுகையில், 'மிகக்குறைவாகவே மழை பெய்துள்ளதால் கர்நாடகாவில் போதிய அளவில் தண்ணீர் இல்லை. போதிய மழை பெய்யாததால் கூடுதலாக தண்ணீர் திறக்க முடியவில்லை. பிரச்னையை இருதரப்பினரும் பகிர்ந்து கொள்ள வேண்டும்' எனக் கூறினார். தமிழகம் சார்பில் தண்ணீர் திறக்க முறையிடப்பட்டு வரும் நிலையில், கர்நாடக முதல்வர் மறுப்பு தெரிவித்தது பரபரப்பை ஏற்படுத்தியுள்ளது.