தமிழக பா.ஜ., மேலிட பொறுப்பாளர் மாற்றம்?

சென்னை,-தமிழக பா.ஜ., மேலிட பொறுப்பாளர் சி.டி.ரவியை மாற்றி விட்டு, தமிழக அரசியல் சூழலை நன்கு அறிந்தவரை நியமிக்க, கட்சி மேலிடம் முடிவு செய்துள்ளது.

இதுகுறித்து, அக்கட்சி வட்டாரங்கள் கூறியதாவது:

தமிழக பா.ஜ., மேலிட பொறுப்பாளராக சி.டி.ரவியும், இணை பொறுப்பாளராக சுதாகர் ரெட்டியும் உள்ளனர்.

தமிழகத்தில் கிளை அளவில் கட்சியை பலப்படுத்தும் நடவடிக்கையில், மாநில தலைவர் அண்ணாமலை தீவிரமாக ஈடுபட்டுள்ளார்.

ஒரு மாநிலத்தின் மேலிட பொறுப்பாளராக உள்ளவர், அந்த மாநிலத்திற்கு அடிக்கடி சென்று, நிர்வாகிகளை சந்தித்து, கட்சி பணி குறித்து ஆலோசிப்பதுடன், வளர்ச்சி பணிகளை கேட்டறிய வேண்டும். அந்த விபரங்களை, தேசிய தலைமைக்கு தெரிவிப்பதுடன், மாநிலத்திற்கு தேவைப்படும் உதவிகளை பெற்றுத் தர வேண்டும்.

தமிழக பா.ஜ., மைய குழு, மாநில செயற்குழு கூட்டம் போன்றவற்றில் மட்டும் தான் சி.டி.ரவி பங்கேற்கிறார்.

அவர், தமிழகத்தில் முக்கிய நபர்களை மட்டுமே சந்திப்பதாகவும், தொண்டர்களை சந்திக்காததுடன், கட்சி நிகழ்ச்சிகளிலும் சரிவர பங்கேற்பதில்லை என்றும், தலைமைக்கு புகார்கள் சென்றுள்ளன.

சமீபத்தில் நடந்த கர்நாடகா சட்டசபை தேர்தலில், சிக்கமகளூரு தொகுதியில் போட்டியிட்ட சி.டி.ரவி தோல்வி அடைந்தார். அதனால், அவர் மீது மேலிடம் அதிருப்தி அடைந்துள்ளது.

மேலும், தமிழக சட்டசபை தேர்தலின்போது, பா.ஜ., விரும்பிய மயிலாப்பூர், ராசிபுரம், தி.நகர் உள்ளிட்ட தொகுதிகளை, அ.தி.மு.க., தலைமை ஒதுக்கவில்லை.

இந்த விஷயத்தில் மேலிட பொறுப்பாளர் ரவி கறாராக இருந்திருந்தால், கேட்ட தொகுதிகள் கிடைத்திருக்கும். 20 தொகுதிகளில் போட்டியிட்டதில், பா.ஜ.,வுக்கு 10 தொகுதிகளில் வெற்றி கிடைத்திருக்கும்.

இதே நிலை, வரும் லோக்சபா தேர்தலில் ஏற்படக் கூடாது என்பதில், மாநில தலைமை உறுதியாக உள்ளது. எனவே, சி.டி.ரவியை மாற்றி விட்டு, தமிழக அரசியல் சூழலை நன்கு அறிந்த ஒருவரை, மேலிட பொறுப்பாளராக நியமிக்க, கட்சி மேலிடம் முடிவு செய்துள்ளது.

இவ்வாறு அந்த வட்டாரங்கள் கூறின.