லோக்சபா தேர்தலில் போட்டியிட மாட்டேன்: அண்ணாமலை அறிவிப்பு

கோவை: 2024ம் ஆண்டு லோக்சபா தேர்தலில் நான் போட்டியிட மாட்டேன் என தமிழக பாஜ., தலைவர் அண்ணாமலை கூறியுள்ளார்.

வரும் 2024 லோக்சபா தேர்தலில், தமிழக பாஜ., தலைவர் அண்ணாமலை கோவையில் போட்டியிட உள்ளதாக கடந்த சில மாதங்களாகவே தகவல்கள் பரவி வந்தது. இந்நிலையில், கோவையில் இன்று(மே 21) செய்தியாளர்களைச் சந்திப்பில் அண்ணாமலை கூறியதாவது: 2024ம் ஆண்டு லோக்சபா தேர்தலில் நான் போட்டியிட மாட்டேன். தமிழகத்தில் ஆட்சி மாற்றத்தைக் கொண்டு வர வேண்டும் என்பதற்காகவே நான் பா.ஜ.,விற்கு வந்திருக்கிறேன்.

கோவை தொகுதியில் நிற்பதற்கு கட்சியில் திறமையான பலர் இருக்கிறார்கள். அவர்களை வெற்றி பெறச் செய்வது என் வேலை. மாநிலத் தலைவராக, பாஜ., விற்கு ஒரு தொண்டனாகவே பணியாற்ற நினைக்கிறேன். தமிழகத்தை விட்டு டில்லி அரசியலுக்கு செல்ல விருப்பமில்லை. இந்த மண்ணிலேயே என் அரசியல் இருக்க வேண்டும் என்று விரும்புகிறேன். எந்த காரணத்திற்காகவும் டில்லி அரசியலுக்குச் செல்ல எனக்கு விருப்பமில்லை. இவ்வாறு அவர் கூறினார்.