மகன் காதல் திருமணம்: தந்தை உடலை கல்லறையில் அடக்கம் செய்ய எதிர்ப்பு

தேனி : தேனி மாவட்டம் கோட்டூரில் மகன் காதல் திருமணம் செய்ததால் தந்தையின் உடலை கல்லறையில் அடக்கம் செய்ய திருச்சபையினர் எதிர்ப்பு தெரிவித்தனர். போலீசாரின் பேச்சுவார்த்தைக்கு பின் அனுமதியளிக்கப்பட்டது.

கோட்டூர் ஆர்.சி.,காலனியை சேர்ந்த கொத்தனார் ஜான்பீட்டர் 57. இவருக்கு அருளானந்தம், அமல்ராயன், ஆரோன், ஆமோஸ் ஆகிய மகன்கள் உள்ளனர். மூத்த மகன் போலீஸ்காரராகவும், அமல்ராயன் பேராசிரியராகவும் உள்ளனர். ஆரோன் மண் அள்ளும் வாகன டிரைவர். இவர் சில ஆண்டுகளுக்கு முன் ஹிந்து பெண்ணை காதலித்து திருமணம் செய்தார். இத்தம்பதியினருக்கு குழந்தைகள் உள்ளனர்.

உடல்நலம் சரியின்றி நேற்று முன்தினம் மாலை ஜான்பீட்டர் இறந்தார். இவ்வூரில் பிறப்பு முதல் இறப்பு வரையிலான நிகழ்வுகளில் திருச்சபை நிர்வாகிகளை அழைத்து மணி ஓசை எழுப்பி குறிப்பிட்ட சமூகத்தினர் ஒன்று கூடி பங்கேற்பர். அதன்படி ஜான் பீட்டர் இறுதிசடங்கு நடத்தி வைக்க திருச்சபை நிர்வாகிகளை அவரது மகன்கள் அழைத்தனர். ஆனால் திருச்சபை நிர்வாகிகள் மணி ஒலிக்க மறுத்ததுடன் ஜான்பீட்டரின் மகன் ஆரோன் திருச்சபை நடைமுறைகளை மீறி மாற்று மத பெண்ணை திருமணம் முடித்துள்ளார்.

இதனால் அவர்கள் இருவரும் சர்ச் நிர்வாகிகள், பொது மக்கள் முன் 'மன்னிப்பு' கேட்க வேண்டும்,' என்றனர்.


அதற்கு ஆரோன் மறுத்து சட்டப்படி செல்வேன் என்றதால் பதட்டம் ஏற்பட்டது. இதனால் ஊர்மக்கள் இந்த துக்கத்தில் பங்கேற்கவில்லை.

ஏ.டி.எஸ்.பி., சுகுமாறன், டி.எஸ்.பி., பார்த்திபன், இன்ஸ்பெக்டர்கள் ராஜேஷ், வெங்கடாஜலபதி திருச்சபை பொறுப்பாளர்கள் சுவிக்கான்ராஜா, ராஜா, கோட்டூர் ஊராட்சித் தலைவர் முத்துவேல், ஒன்றிய கவுன்சிலர் மாலா முன்னிலையில் பேச்சுவார்த்தை நடத்தினர். அதையடுத்து ஜான்பீட்டர் உடல் கல்லறையில் அடக்கம் செய்யப்பட்டது. இதையொட்டி கல்லறை பகுதி, இறந்தவர் வீடு உள்ளிட்ட ஊரில் ஏராளமான போலீசார் பாதுகாப்புப்பணியில் ஈடுபட்டனர்.