கர்நாடக முதல்வராகிறார் சித்து?: துணை முதல்வராகிறார் சிவா?

பெங்களூரு: கர்நாடகவின் முதல்வரை தேர்தெடுப்பதில் சிக்கல் நிலவி வந்த நிலையில், முதல்வராக சித்தராமையாவை காங்கிரஸ் கட்சி மேலிடம் அறிவிக்க உள்ளதாக கூறப்படுகிறது. டி.கே சிவகுமாருக்கு துணை முதல்வர் பதவியும், முக்கியமான இலாகாக்களுக்கும் ஒதுக்கப்படலாம் என தகவல் வெளியாகியுள்ளது.



கர்நாடக சட்டசபை தேர்தலில் மொத்தம் உள்ள, 224 சட்டசபை தொகுதிகளில், காங்கிரஸ் 135, பா.ஜ., 66, ம.ஜ.த., 19, மற்றவர்கள் நான்கு தொகுதிகளில் வெற்றி பெற்றனர். ஆட்சி அமைக்க தேவையான தனி பெரும்பான்மை பெற்றதால், காங்கிரஸ் அரியணையில் அமர உள்ளது. இந்நிலையில், முதல்வர் பதவிக்கு, மாநில தலைவர் சிவகுமார், 60, முன்னாள் முதல்வர் சித்தராமையா, 75, இடையே குடுமிப்பிடி சண்டை நடந்து வருகிறது.

டில்லியில் காங்கிரஸ் முன்னாள் எம்.பி ராகுலை இன்று(மே 17) சித்தராமையா மற்றும் டி.கேசிவகுமார் தனி தனியாக சந்தித்தனர். அப்போது கர்நாடகா முதல்வர் நியமனம் குறித்து ஆலோசனை செய்ததாக கூறப்படுகிறது.

இந்நிலையில், கர்நாடகாவின் முதல்வராக, சித்தராமையாவும், டி.கே சிவகுமாருக்கு துணை முதல்வர் பதவியும், முக்கியமான இலாகாக்களுக்கும் ஒதுக்கப்படலாம் என தகவல் வெளியாகியுள்ளது. நாளை மாலை 3.30 மணிக்கு பெங்களூருவில் நடக்க உள்ள நிகழ்ச்சியில் பதவியேற்க உள்ளனர் எனக் கூறப்படுகிறது.


ராகுலை சந்தித்த பின் சித்தராமையா அளித்த பேட்டி: கர்நாடக முதல்வர் தேர்வில் காங்கிரஸ் தலைமை என்ன முடிவு எடுக்கிறதோ அதற்கு கட்டுப்படுவேன் எனக் கூறியுள்ளார்

72 மணி நேரத்தில்

இதனிடையே, மல்லிகார்ஜூன கார்கே வீட்டின் முன்பு காங்கிரஸ் கட்சியின் ரன்தீப் சுர்ஜேவாலா கூறுகையில், காங்கிரசில் தலைவர் மிகத்தீவிரமாக ஆலோசனை நடத்தி வருகிறார். எந்த முடிவு எடுத்தாலும், அது உங்களிடம் அறிவிக்கப்படும். அடுத்த 48 முதல் 72 மணி நேரத்தில் கர்நாடகாவில் புதிய அமைச்சரவை அமைக்கப்படும். இவ்வாறு அவர் கூறினார்.