கவர்னர் குறித்து அவதூறாக பேசிய சிவாஜி கிருஷ்ணமூர்த்தி: மீண்டும் திமுக.,வில் சேர்ப்பு

சென்னை: கவர்னர் ரவியை மிரட்டல் விடுக்கும் வகையில் தகாத வார்த்தைகளால் பேசிய திமுக பேச்சாளர் சிவாஜி கிருஷ்ணமூர்த்தியை கட்சியில் இருந்து நீக்கிய நிலையில், தற்போது மீண்டும் திமுக.,வில் சேர்க்கப்பட்டுள்ளார்.

தமிழக சட்டசபையில் கவர்னர் ரவி உரையின்போது சில வார்த்தைகளை சொல்லாமல் தவிர்த்த சம்பவத்தால் கூச்சல், குழப்பம் ஏற்பட்டது. இதனால், சட்டசபையில் இருந்து கவர்னர் ரவி பாதியில் வெளியேறினார். இந்த சம்பவத்தை வைத்து திமுக பேச்சாளரான சிவாஜி கிருஷ்ணமூர்த்தி மிரட்டல் விடுக்கும் வகையில் தகாத வார்த்தைகளில் கவர்னரை திட்டி பேசியிருந்தார்.

அவரது பேச்சில், ‛கவர்னர் ரவி உரை நிகழ்த்திய போது பேப்பரில் எழுதி கொடுத்த படி படித்திருந்தால் அவர் காலில் பூப்போட்டு அனுப்பியிருப்போம். ஆனால், தமிழகத்தில் இந்தியாவுக்கு சட்டத்தை எழுதிக் கொடுத்த அம்பேத்கர் பெயரை சொல்ல மாட்டேன் என்று சொன்னால் கவர்னரை செருப்பால் அடிக்கும் உரிமை எனக்கு உள்ளது' என்பது போன்ற மேலும் பல தகாத வார்த்தைகளால் பேசியிருந்தார். இதற்கு எதிர்ப்பு கிளம்பிய நிலையில், சிவாஜி கிருஷ்ணமூர்த்தியை திமுக.,வில் இருந்து தற்காலிகமாக நீக்கி உத்தரவிட்டிருந்தனர்.

இந்நிலையில் சென்னை வடக்கு மாவட்ட தலைமை பேச்சாளர் சிவாஜி கிருஷ்ணமூர்த்தி மீண்டும் கட்சியில் இணைக்கப்பட்டுள்ளார். தனது பேச்சுக்கு வருத்தம் தெரிவித்ததால் சிவாஜி கிருஷ்ணமூர்த்தி மீதான ஒழுங்கு நடவடிக்கை ரத்து செய்யப்பட்டுள்ளதாக திமுக தலைமை கழகம் தெரிவித்துள்ளது.