பழநியில் போகர் ஜெயந்தி விழா நடத்தலாம்: உயர் நீதிமன்றம் உத்தரவு

மதுரை: பழநியில் சித்தர் போகர் சன்னிதியில், வரும் 18ல் ஜெயந்தி விழா நடத்த உயர் நீதிமன்ற மதுரைக் கிளை அனுமதித்தது.

கரூர் அப்பிபாளையம் சிவசுவாமி என்பவர் தாக்கல் செய்த பொதுநல மனு: பழநி தண்டாயுதபாணி சுவாமி கோவிலுக்கு வழிபட சென்றேன். போகர் சன்னதியில் தரிசனத்திற்கு சென்றேன். அங்கு வண்ணம் பூசும் பணி நடைபெறுவதாகக் கூறி பக்தர்களை அனுமதிக்காமல் தடுத்தனர். 'நாங்கள் புலிப்பாணி ஆசிரமத்தைச் சேர்ந்தவர்கள். மே 18ல் போகர் சன்னிதியில் போகர் ஜெயந்தி கொண்டாட ஏற்பாடு செய்கிறோம்' என்றனர். பல ஆண்டுகளாக பழநி கோவிலுக்கு சென்று வருகிறேன். இதுபோன்ற விழா கொண்டாடுவது குறித்து எந்த தகவலும் இல்லை. கோவில் நிர்வாகமும் இதுபோன்ற விழா நடத்தியதில்லை. கோவில் பொதுவானது. இதில் தனிப்பட்ட யாருக்கும் உரிமை இல்லை. தனிநபர் மற்றும் குறிப்பிட்ட நபர்கள் நடத்தும் விழாக்களை தடை செய்ய வேண்டும். நடவடிக்கை எடுக்க உத்தரவிட வேண்டும். இவ்வாறு சிவசுவாமி குறிப்பிட்டார்.

அந்த மனுவை, நீதிபதிகள் ஜி.ஆர்.சுவாமிநாதன், எஸ்.ஸ்ரீமதி அமர்வு விசாரித்தது.

அறநிலையத்துறை தரப்பு, மலைக்கோயிலில் மூலவர் முருகன் குறித்த திருவிழாக்கள் நடந்து வருகின்றன. மலைக்கோயிலுள்ள போகர் சன்னதியில் கோயிலின் சொத்துக்களான மரகதலிங்கம், புவனேஸ்வரி அம்மன் உள்ளிட்ட விலையுயர்ந்த விக்ரகங்களை ஒப்படைத்து பூஜை செய்துவர அனுமதிக்கப்பட்டுள்ளது. கோயிலின் பழக்க வழக்கம், ஆகம விதிகளுக்கு முரணாக மலைக்கோயிலில் போகர் சன்னதியில் போகர் ஜெயந்தி நடத்த தடை விதித்து கோயில் நிர்வாகம் உத்தரவிட்டுள்ளது.

புலிப்பாணி ஆசிரமம் தரப்பில், 'தண்டாயுதபாணி சுவாமி சிலையை செய்தவர் சித்தர் போகர். அவரது சமாதி ஆசிரம பராமரிப்பில் உள்ளது. பல ஆண்டுகளாக போகர் ஜெயந்தி நடந்து வருகிறது. 'இதில் அறநிலையத்துறை உள்ளிட்ட அதிகாரிகள் பங்கேற்றுள்ளனர். இதற்கு முன் யாரும் இடையூறு ஏற்படுத்தவில்லை' என தெரிவிக்கப்பட்டது.

நீதிபதிகள் பிறப்பித்த உத்தரவு: போகர் ஜெயந்தி பல ஆண்டுகளாக நடந்துள்ளது. எனவே, மே 18 காலை 11:00 முதல் மதியம் 2:00 மணிவரை மண்டபம், போகர் சன்னிதியில் அவரது ஜெயந்தி விழா, மரகத லிங்கத்திற்கு அபிஷேகம், புவனேஸ்வரி அம்மனுக்கு பூஜை, ஆராதனை நடத்திக் கொள்ளலாம். இவ்வாறு உத்தரவிட்டனர்.