சத்தீஸ்கரில் மதுபான விற்பனையில் ரூ.2,000 கோடி மோசடி : ஒவ்வொரு பாட்டிலிலும் ஊழல்

சத்தீஸ்கரில், மது விற்பனைக்கு லஞ்சம், சட்ட விரோதமாக மது விற்பனை செய்வதற்கு கமிஷன் என நடந்த மிகப் பெரும் மோசடி தொடர்பான வழக்கில், மதுபான தொழிலதிபர் அன்வர் தேபார், அமலாக்கத் துறையினரால் கைது செய்யப்பட்டுள்ளார்.



ஒவ்வொரு மது பாட்டிலிலும் ஊழல் நடந்துள்ளதாக அமலாக்கத் துறை குற்றஞ்சாட்டியுள்ளது.ராய்ப்பூர்-சத்தீஸ்கரில் முதல்வர் பூபேஷ் பாகேல் தலைமையில் காங்கிரஸ் ஆட்சி நடக்கிறது. தமிழகத்தில், 'டாஸ்மாக்' போலவே, இங்கு, சத்தீஸ்கர் மாநில வாணிபக் கழகம் வாயிலாகவே, மதுபான கொள்முதல், விற்பனை நடக்கிறது. இதன் கட்டுப்பாட்டில், ௮௦௦ கடைகள் உள்ளன.
தமிழகத்தைப் போலவே, சத்தீஸ்கர் அரசுக்கும் மதுக் கடைகள் வாயிலாகவே அதிக வருவாய் கிடைத்து வருகிறது.

குற்றச்சாட்டு

இங்கு மதுபான விற்பனையில் பெரும் மோசடி நடந்துள்ளதாக, வருமான வரித் துறை, ௨௦௨௨ல் வழக்குப் பதிவு செய்தது.

அதனடிப்படையில் இதில் நடந்துள்ள பண மோசடி தொடர்பாக அமலாக்கத் துறை வழக்குப் பதிவு செய்து விசாரித்து வந்தது.

இந்த வழக்கில், மாநில தொழில் மற்றும் வர்த்தகத் துறை செயலராக உள்ள மூத்த ஐ.ஏ.எஸ்., அதிகாரி அனில் துதேஜா உள்ளிட்டோர் மீது குற்றஞ்சாட்டப்பட்டுள்ளது.

இந்நிலையில், மதுபான தொழிலதிபர் அன்வர் தேபார் நேற்று முன்தினம் கைது செய்யப்பட்டார்.

ராய்ப்பூரில் உள்ள சிறப்பு நீதிமன்றத்தில் ஆஜர்படுத்தப்பட்ட அவரை, நான்கு நாட்கள் காவலில் எடுத்து விசாரிக்க அனுமதி வழங்கப்பட்டுள்ளது. வழக்கின் விசாரணையின்போது, அமலாக்கத் துறை சார்பில் கூறப்பட்டு உள்ளதாவது:

கடந்த, 2019 முதல் மதுபான விற்பனையில் மோசடி நடந்துள்ளது. மதுபானங்களை விற்பதற்காக, குறிப்பிட்ட அளவுக்கு கமிஷன் நிர்ணயிக்கப்பட்டுஉள்ளது.

கூடுதல் விலை

இதைத் தவிர கணக்கில் காட்டாமல் மதுபானங்கள் விற்பனை செய்யவும் அனுமதிக்கப்பட்டுள்ளது. ஒவ்வொரு மது பாட்டிலிலும் ஊழல் நடந்துள்ளது.

மொத்த மதுபான விற்பனையில், 40 சதவீதம் வரை, கணக்கில் காட்டாத மதுபானங்கள் விற்கப்பட்டுள்ளன. அதாவது, மதுபான தொழிற்சாலைகளில் இருந்து, அரசு குடோனுக்கு செல்லாமல், நேரடியாக கடைகளுக்கு மதுபானங்கள் அனுப்பப்படும். இதற்கு வருமான வரி, கலால் வரி போன்றவை செலுத்த வேண்டியதில்லை.

இதன் வாயிலாக அரசு கஜானாவுக்கு ஒரு காசு கூட போகாது. மதுபான தொழிற்சாலைகளுக்கு உரிய பணம் கிடைத்துவிடும். கூடுதல் விலை, வரி ஏய்ப்பில் கிடைக்கும் பணம், மோசடி கும்பலுக்கு சென்று விடும்.

இந்த வகையில், 2,000 கோடி ரூபாய் அளவுக்கு மோசடி நடந்துள்ளது.

இந்த மோசடிக்கு மூளையாக செயல்பட்டவர், ஐ.ஏ.எஸ்., அதிகாரி அனில் துதேஜா. மதுபான தொழிலதிபர் அன்வர் தேபார் இந்த மோசடி திட்டத்தை செயல்படுத்துவதுடன், கமிஷன் மற்றும் மோசடி பணங்களை வசூலித்து வந்தார்.

இவர் காங்கிரசைச் சேர்ந்த ராய்பூர் மேயர் அய்ஜாஸ் தேபாரின் சகோதரர்.

இந்த மோசடியில் கிடைத்துள்ள பணத்தை, அன்வர் தேபார், அனில் துதேஜா இருவரும் மற்ற அதிகாரிகள் மற்றும் அரசியல்வாதிகளுக்கும் பிரித்து கொடுத்துள்ளனர்.

இந்த பணம் தேர்தலுக்கும் பயன்படுத்தப்பட்டுஉள்ளது விசாரணையில் தெரியவந்துள்ளது.

இவ்வாறு அமலாக்கத் துறை கூறியுள்ளது.