தமிழக நிதிநிலையை சீரமைக்க லண்டனிலிருந்து... புதுக் குழு!

- நமது நிருபர் - தமிழக அரசின் நிதி நிலையை சீரமைக்க, லண்டனை சேர்ந்த 'எர்னஸ்ட் அண்டு யங் கன்சல்டன்சி' நிறுவனத்துடன் ஒப்பந்தம் செய்யப்பட்டு உள்ளது. அந்நிறுவனத்தைச் சேர்ந்த வல்லுனர்கள் குழு, இவ்விவகாரத்தில் தமிழக அரசுக்கு உதவ முன்வந்துள்ளது. அதன் அடிப்படையில், நிதித் துறை சீரமைப்பு தொடர்பான அறிவிப்புகளை, நிதி அமைச்சர் தியாகராஜன், நாளை வெளியிட உள்ளார்.

தமிழக அரசின் 2023 - 24ம் ஆண்டுக்கான பட்ஜெட்டை, கடந்த மாதம் 20ம் தேதி, நிதி அமைச்சர் தியாகராஜன் தாக்கல் செய்தார்.

அப்போது அவர் கூறியதாவது:

தி.மு.க., அரசு பதவியேற்றபோது, நிதி நெருக்கடியை சந்தித்தது. இதற்கு முக்கியக் காரணம், முந்தைய ஆண்டுகளில், தமிழகத்தின் வரி வருவாயில் ஏற்பட்ட வீழ்ச்சியே.

கடந்த 2006 முதல் 2011 வரையிலான ஆண்டுகளில், மாநிலத்தின் மொத்த உள்நாட்டு உற்பத்தியில், மாநிலத்தின் சொந்த வரி வருமானம், எட்டு சதவீதமாக இருந்தது. கடந்த பத்து ஆண்டுகளில் தொடர்ந்து வீழ்ச்சி கண்டு, 2020 - 21ம் ஆண்டு, 5.58 சதவீதமாக குறைந்தது.

கடந்த இரண்டு ஆண்டுகளாக, அரசு எடுத்த முயற்சிகளின் காரணமாக, இந்த விகிதம் 6.11 சதவீதமாக உயர்ந்துள்ளது. இதை மேலும் உயர்த்தி, நலத் திட்டங்களுக்கான வருவாய் ஆதாரங்களை ஈட்ட, முனைப்போடு செயல்படுவோம்.

இவ்வாறு அவர் கூறியிருந்தார்.

அதன்படி, நிதி நிலையை சீர் செய்வது தொடர்பாக, தமிழக அரசுக்கு ஆலோசனைகள் வழங்க, உலகப் புகழ் பெற்ற நிபுணர்களைக் கொண்ட, பொருளாதார ஆலோசனைக் குழு அமைக்கப்பட்டுள்ளது. 'நபார்டு' வங்கி நிதியுதவியுடன் செயல்படுத்தப்படும் திட்டங்களை கண்காணிக்க, விரைவுப்படுத்த, நிதியை ஒழுங்குபடுத்த, நபார்டு ஆலோசனை சேவை நிறுவனத்தை, நிதித் துறை நியமித்துள்ளது.

அதேபோல், பல்வேறு மத்திய அரசு திட்டங்கள், மத்திய அரசு நிதியுதவியுடன் கூடிய திட்டங்கள் போன்றவற்றை கண்காணிக்க, ஆலோசனை வழங்க, இந்திய உள்கட்டமைப்பு நிதி நிறுவனம் நியமிக்கப்பட்டுள்ளது.

இது தவிர, லண்டனில் செயல்படும், பிரபல 'கன்சல்டன்சி' நிறுவனமான 'எர்னஸ்ட் அண்டு யங்' என்ற நிறுவனத்துடன், தமிழக அரசு புரிந்துணர்வு ஒப்பந்தம் செய்துள்ளது. இந்நிறுவன வல்லுனர்கள் குழு, தமிழகத்தில் உள்ள, 50 அரசு பொதுத் துறை நிறுவனங்களை ஆய்வு செய்ய உள்ளது.

பொதுத் துறை நிறுவனங்களின் ஆண்டு அறிக்கைகள், நடப்பு வருமான குறிப்புகள், இடைக்கால பொருளாதார அறிக்கைகள் ஆகியவற்றையும், நிறுவனத்தின் செயல் திறனையும் ஆய்வு செய்ய உள்ளது. ஆய்வு அறிக்கையுடன், நிறுவனத்தின் வருமானத்தை அதிகரிக்க, மேற்கொள்ள வேண்டிய நடவடிக்கைகள் குறித்தும், அரசுக்கு ஆலோசனைகள் வழங்க உள்ளது.

நிதி அமைச்சகத்தின், பொது நிறுவனங்களின் பணியகம் பிரிவுடன் இணைந்து, இக்குழுவினர் செயல்பட உள்ளனர்.

முதல் கட்டமாக, தமிழ்நாடு தேயிலை தோட்டக் கழகம், ஆதிதிராவிடர் வீட்டுவசதி மற்றும் மேம்பாட்டு கழகம், சாலை உள்கட்டமைப்பு மேம்பாட்டுக் கழகம், சிறு தொழில் வளர்ச்சிக் கழகம், மாநில தொழில்கள் மேம்பாடு, தொழில் வளர்ச்சிக் கழகம், பூம்புகார் கப்பல் போக்குவரத்துக் கழகம், சென்னை குடிநீர் வழங்கல் வாரியம், தமிழ்நாடு குடிநீர் வாரியம் ஆகியவை ஆய்வு செய்யப்பட உள்ளன.

தமிழக அரசின் வருவாயை பெருக்கவும், வருவாய் பற்றாக்குறை மற்றும் நிதி பற்றாக்குறையை குறைக்கவும், அரசு முழு முயற்சியில் ஈடுபட்டுள்ளது. அதற்கு அரசு நியமித்துள்ள ஆலோசனை நிறுவனங்கள், பல்வேறு வகையில் உதவ உள்ளன.

இது தவிர, நிர்வாக ரீதியாகவும் பல சீரமைப்பு பணிகள் மேற்கொள்ளப்பட உள்ளன. இது தொடர்பான அறிவிப்பு, சட்டசபையில் நாளை நடக்கும் நிதித் துறை மானிய கோரிக்கை விவாதத்தின்போது, அமைச்சர் தியாகராஜன் வெளியிடுவார் என, எதிர்பார்க்கப்படுகிறது.

சட்டசபையில் நேற்று, அமைச்சர் தியாகராஜன் கூறியதாவது:

துறையில் பல சீர்திருத்தங்களை செய்துள்ள போதிலும், இன்னும் சில நடவடிக்கைகள் எடுக்க வேண்டி உள்ளது. நாளை மானிய கோரிக்கை விவாதத்தின்போது, பல அறிவிப்புகள் வரும். மக்கள், அரசு அலுவலகங்களுக்கு வராமல் சேவைகளைப் பெற நடவடிக்கை எடுத்து வருகிறோம்.

கடனிலும், நிதி பற்றாக்குறையிலும் அரசு செயல்படுகிறது. கையில் உள்ள நிதியில், நீர் நிலைகளை துார் வாருதல், சாலைகள், பாலங்கள் அமைத்தல் போன்ற பணிகள் மேற்கொள்ளப்படுகின்றன.

அரசுக்கு செலுத்த வேண்டிய நிதியை, மிக எளிமையாக 'ஆன்லைனில்' செலுத்த நடவடிக்கை எடுக்கப்படுகிறது. இவ்வாறு அவர் கூறினார்.