சிவகாசி : சிவகாசி அருகே நாரணாபுரம் புதுாரில் பட்டாசு ஆலையில் நேற்று முன்தினம் இரவு ஏற்பட்ட வெடி விபத்தில், இரு அறைகள் தரைமட்டமானது. மேலும், இரு அறைகள் சேதமடைந்தன.

விருதுநகர் மாவட்டம், சிவகாசி, காத்தநாடார் தெருவைச் சேர்ந்தவர் ராஜாராம், 52. இவருக்கு சொந்தமான பட்டாசு ஆலை, நாரணாபுரம் புதுாரில் உள்ளது.

நாக்பூர் உரிமம் பெற்ற இந்த ஆலையில், 52 அறைகள் உள்ளன. நேற்று முன்தினம் மாலை வழக்கமான பணிகள் முடிந்து பட்டாசு ஆலை பூட்டப்பட்டது.

இரவு, 11:50 மணிக்கு மருந்து கலவை இருப்பு வைக்கப்பட்டிருந்த அறையில் திடீரென வெடி விபத்து ஏற்பட்டது. அருகிலேயே முழுமைடையாத பட்டாசுகள் வைக்கப்பட்டிருந்த அறைக்கு, தீ பரவியதில் பட்டாசுகள் வெடித்து, இரு அறைகள் தரைமட்டமாகின.

மேலும் இரு அறைகள் சேதமடைந்தன. வெடி விபத்தால் ஆலையை சுற்றி 5 கி.மீ., துாரத்திற்கு சத்தம் கேட்டது. அடுத்தடுத்து பட்டாசுகள் வெடித்துக் கொண்டே இருந்ததால், சிவகாசி தீயணைப்பு வீரர்களால் உள்ளே செல்ல முடியவில்லை.

ஒரு மணி நேரத்திற்கு பின் உள்ளே சென்று தீயை அணைக்கும் பணியை ஊழியர்கள் துவங்கினர். இரண்டரை மணி நேரம் போராடி தீ அணைக்கப்பட்டது.

ஆலையில் ஆட்கள் இல்லாததால் அசம்பாவிதம் தவிர்க்கப்பட்டது. சிவகாசி கிழக்கு போலீசார் விசாரிக்கின்றனர்.