சென்னை-தமிழகத்தில் எப்போதும் இல்லாத வகையில், 1 சவரன் ஆபரண தங்கம் விலை, 44 ஆயிரத்து 480 ரூபாய் என்ற உச்சத்தை அடைந்துள்ளது. கிராம், 5,560 ரூபாய்க்கு விற்பனையானது.

தமிழகத்தில் பிப்., 2ல், 22 காரட் ஆபரண தங்கம் 1 கிராம், 5,505 ரூபாய்க்கும்; சவரன், 44 ஆயிரத்து, 40 ரூபாய்க்கும் விற்பனையாகின. இதுவே, தங்கம் விற்பனையில் உச்ச விலையாக இருந்தது. பின், தங்கம் விலை குறைவதும், ஏறுவதுமாகவும் இருந்தது.

அமெரிக்காவில் உள்ள நான்கு வங்கிகள் சமீபத்தில் திவாலானதால், உலக முதலீட்டாளர்கள் பங்குச் சந்தை, ரியல் எஸ்டேட் உள்ளிட்ட மற்ற முதலீடுகளை தவிர்த்து, தங்கத்தில் அதிக முதலீடு செய்து வருகின்றனர்.

இதனால், ஒரு வாரமாக தங்கம் விலை மிகவும் அதிகரித்து வருகிறது.

நேற்று முன்தினம் 1 கிராம் தங்கம், 5,450 ரூபாய்க்கும்; சவரன், 43 ஆயிரத்து 600 ரூபாய்க்கும் விற்பனையாகின. 1 கிராம் வெள்ளி, 73.10 ரூபாய்க்கு விற்கப்பட்டது.

நேற்று ஒரே நாளில் தங்கம் கிராமுக்கு, 110 ரூபாய் உயர்ந்து, 5,560 ரூபாய்க்கும்; சவரனுக்கு, 880 ரூபாய் அதிகரித்து, இதுவரை இல்லாத அளவாக, 44 ஆயிரத்து 480 ரூபாய்க்கும் விற்பனையாகின. வெள்ளி கிராமுக்கு, 1.30 ரூபாய் உயர்ந்து, 74.40 ரூபாய்க்கு விற்கப்பட்டது.

ஒரு வாரத்தில் மட்டும் கிராமுக்கு, 290 ரூபாயும்; சவரனுக்கு, 2,320 ரூபாயும் அதிகரித்துள்ளது. தங்கம் விலை உயர்ந்திருப்பது, திருமண வீட்டாரிடம் கவலையை ஏற்படுத்தியுள்ளது.