விதை ஒன்று போட்டால், சுரை ஒன்றா முளைக்கும்...?

கோவை தெற்கு தொகுதி பா.ஜ., - எம்.எல்.ஏ., வானதி சீனிவாசன் பேட்டி:

'நீட்' ரகசியத்தை சொல்கிறேன் என்று காலம் கடத்திய விளையாட்டுத் துறை அமைச்சர்உதயநிதி, தொடர் போராட்டம் தான் நீட் ரகசியம் என்று சொல்லியிருப்பது, மாணவ சமுதாயத்தையே ஏமாற்றுவதாகும்.மக்களை ஏமாற்றுவதில், தி.மு.க.,வில் தலைமுறை வேறுபாடுகள் இல்லை என்பதை, அமைச்சர் உதயநிதி உறுதிப்படுத்தியுள்ளார்.

ஹிந்து தமிழர் கட்சி தலைவர் ராம ரவிகுமார் அறிக்கை:

'துாக்கி பிடித்தால் கொடி; திருப்பி பிடித்தால் தடி; எதிர்த்து பேசினால் அடி' என்பது தான் திராவிட மாடலின் திருவாக்கியம். திருச்சியில், தி.மு.க.,வினர் நடத்திய மோதலை பார்க்கும் போது, 'தமிழகத்தில் ஆட்சியை கலைக்க சதி நடக்கிறது' என, இதைத்தான் அரசியல் வானிலை முன்னறிவிப்பு போல, முதல்வர் ஸ்டாலின் சொன்னாரோ என்று எண்ணத் தோன்றுகிறது.

முன்னாள் முதல்வர் பன்னீர்செல்வம் அறிக்கை:

சமீப காலமாக, ஆவின் பால் மற்றும் உபபொருட்கள் வினியோகத்தில், மிகப்பெரிய வீழ்ச்சி ஏற்பட்டுள்ளது. சென்னையில் மட்டும், 14 லட்சம் லிட்டர் பால் விற்கப்பட்டது. சில நாட்களாக, 10 லட்சம் லிட்டர் மட்டுமே விற்கப்படுகிறது. 10 நாட்களாக, எந்த ஆவின் பாலகத்திலும் வெண்ணெய் இருப்பு இல்லை. ஒப்பந்த தொழிலாளர்கள் பிரச்னைக்கு முன்கூட்டியே தி.மு.க., அரசு தீர்வு கண்டிருந்தால், பால் பற்றாக்குறை என்ற பிரச்னையே ஏற்பட்டு இருக்காது. இந்த நிலைக்கு, தி.மு.க., அரசின் அலட்சியப் போக்கே காரணம்.

தமிழக பா.ஜ., துணைத் தலைவர் நாராயணன் திருப்பதி அறிக்கை:

'கல்வி உரிமை பறிக்கப்படும் போது, தைரியமாக குரல் கொடுப்பதே, நீட் விலக்கிற்கான ரகசியம்' என, உதயநிதி தெரிவித்துள்ளார். கல்வி என்ற பெயரால், லஞ்சம், ஊழல் வழியே மக்களிடம் பணம் பறிக்கப்பட்ட போது, தைரியமாக அறிமுகப்படுத்தப்பட்டதே நீட் தேர்வு. அது ரகசியம் அல்ல; வெளிப்படையான சீர்திருத்தம்.