27ல் சென்னை விமான நிலைய புதிய முனையம் திறப்பு

சென்னை: சென்னை விமான நிலையத்தில் புதிதாக கட்டப்பட்டுள்ள நவீன முனையத்தை, வரும் 27ம் தேதி பிரதமர் மோடி திறந்து வைக்கிறார்.

சென்னை விமான நிலையத்தில், 2,400 கோடி ரூபாய் மதிப்பில், 2.36 லட்சம் சதுர மீட்டரில் கட்டப்பட்டு வரும், ஒருங்கிணைந்த விமான முனையங்களின் முதல் கட்டடம் நிறைவடைந்துள்ளது. இந்த முனையம் செயல்பாட்டுக்கு வந்ததும், பயணியரின் எண்ணிக்கை 2.2 கோடியில் இருந்து, 3.5 கோடியாக அதிகரிக்கும்.

இந்த புதிய முனையத்தின் கீழ் தளத்தில், பயணியர் உடைமைகள் கையாளப்பட உள்ளன. முதல் தளத்தில் சர்வதேச வருகை பயணியருக்கான வழக்கான நடைமுறைகள்; இரண்டாவது தளத்தில், பயணியருக்கான புறப்பாடு நடைமுறைகள் மேற்கொள்ளப்பட உள்ளன. மொத்தம், ஐந்து தளங்கள் இந்த புதிய முனையத்தில் அமைகின்றன.


புதிய விமான முனையத்தின் கட்டுமானப் பணிகள் முடிந்து விட்டன. பொருத்தப்பட்டுள்ள கருவிகள், உபகரணங்களில் சோதனைகள் நடந்து வருகின்றன. அடுத்த மாதம் திறக்கப்பட இருந்த நிலையில், பிரதமரின் அனுமதி முன்கூட்டியே கிடைத்திருப்பதால், வரும் 27ம் தேதி, புதிய முனையம் திறப்பு விழா நடக்கிறது.

டில்லியில் இருந்து 27ம் தேதி காலை ராமேஸ்வரம் வரும் பிரதமர், அங்கு நடக்கும் நிகழ்ச்சிகளை முடித்து, சென்னை வருகிறார். சென்னை விமான நிலையத்தில் நடக்கும் விழாவில், புதிய விமான முனையத்தை திறந்து வைக்கிறார்.