காலிஸ்தான் ஆதரவு யூடியூப் சானல்கள் முடக்கம்: மத்திய அரசு அதிரடி

புதுடில்லி: காலிஸ்தான் அமைப்புக்கு ஆதரவாக இயங்கி வந்த சமூக வலைதளமான 6 யூடியூப் சானல்களை மத்திய அரசு முடக்கியுள்ளது.


பஞ்சாபை பிரித்து தனிநாடாக அறிவிக்க, பல ஆண்டுகளுக்கு முன் ஆயுதப் போராட்டம் நடத்திய காலிஸ்தான் பயங்கரவாத அமைப்பு வெளிநாடுகளிலிருந்து செயல்பட்டு வருகிறது.

பஞ்சாபில் கடந்த பிப்.23-ல் 'வாரிஸ் பஞ்சாப் டி' என்ற அமைப்பை சேர்ந்த ஒருவரை போலீசார் கைது செய்ததை கண்டித்து அந்த அமைப்பின் தலைவர் அம்ரித் பால் சிங் தலைமையில் ஆயிரக்கணக்கானோர், கத்தி, வாளுடன் போலீஸ் ஸ்டேசனை முற்றுகையிட்டு போராட்டம் நடத்தினர். இதனால் அங்கு பதற்றம் ஏற்பட்டது. இதையடுத்து அவர் விடுதலை செய்யப்பட்டார்.
இந்நிலையில் காலிஸ்தான் ஆதரவு கொள்கை, கோட்பாடுகளை 6 யூடியூப் சானல்கள் ஒளிபரப்பி வந்துள்ளது மத்திய அரசின் கவனத்திற்கு தெரியவந்தது. இதையடுத்து அந்த சானல்கள் முடக்கி வைக்கப்பட்டதாக மத்திய தகவல் ஒளிரப்பத்துறை செயலர் தெரிவித்தார்.