குடும்ப தலைவிகளுக்கு ஆயிரம் ரூபாய்; விரைவில் அறிவிக்கப்படும்: இறுதி பிரசாரத்தில் ஸ்டாலின் உறுதிமொழி

ஈரோடு: குடும்ப தலைவிகளுக்கு மாதம் ஆயிரம் ரூபாய் உரிமைத்தொகை எப்போது வழங்கப்படும் என்பது பற்றி மார்ச் மாதம் தாக்கல் செய்யப்படும் பட்ஜெட்டில் அறிவிக்கப்படும் என, ஈரோட்டில் இறுதிக்கட்ட பிரசாரத்தில் ஈடுபட்ட முதல்வர் ஸ்டாலின் கூறியுள்ளார்.

ஈரோட்டில் பிரசாரம் செய்த ஸ்டாலின் பேசியதாவது: திமுக அரசு மக்களுக்காக எண்ணற்ற திட்டங்களை நிறைவேற்றி வருகிறது. ஆளுங்கட்சி, கூட்டணி கட்சி மட்டுமின்றி எதிர்க்கட்சி எம்.எல்.ஏ.,க்களின் கோரிக்கையையும் நிறைவேற்றி வருகிறோம்.
அறிவித்த அனைத்து வாக்குறுதிகளை நிறைவேற்றிவிட்டோம் என தவறான தகவலை தெரிவிக்க விரும்பவில்லை. திமுக., ஆட்சிக்கு வந்து எதையும் செய்யவில்லை என எதிர்க்கட்சி தலைவர் கூறி வருகிறார்.
நான் இப்போது ஆதாரத்தை குறிப்பிட்டதை அவர் பார்க்கவேண்டும். இவையெல்லாம், எதிர்க்கட்சி தலைவர் கண்களுக்கு தெரியவில்லை என்றால், கண்டாக்டரை பார்த்து கண்ணாடி போட்டு படித்து பாருங்கள்.
நான் பேசியதையாவது கேட்டு பாருங்கள். இது உண்மையா, இல்லையா என சம்பந்தப்பட்ட நபர்களிடம் கேட்டு பாருங்கள்.


85 சதவீத வாக்குறுதிகளை நிறைவேற்றிவிட்டோம். இன்னும் வாக்குறுதிகள் உள்ளன என்பதை மறுக்கவில்லை. 5 ஆண்டுகளுக்கு செய்ய வேண்டிய பணிகளை தான் வாக்குறுதிகளாக சொல்லி உள்ளோம். எங்களுக்கு 5 ஆண்டுகள் தேவையில்லை. இந்த ஆண்டுக்குள் அனைத்தையும் நிறைவேற்றி காட்டுவேன்.


தேர்தல் வாக்குறுதியில் குடும்ப தலைவிகளுக்கு உரிமைத்தொகை வழங்குவோம் எனக்கூறினோம். நீங்கள் நிதிநிலையை சரியாக வைத்திருந்தால், அதனை உடனடியாக நிறைவேற்றி இருப்போம். ஆனால், கொள்ளையடித்ததுடன் மட்டுமல்லாமல், கஜானாவை காலி செய்துவிட்டு, கடன் வாங்கி சென்றுள்ளீர்கள்.
அதையெல்லாம் சரி செய்து கொண்டுள்ளோம். அதை சரி செய்த உடன், மார்ச் மாதம் தாக்கல் செய்யப்படும் பட்ஜெட்டில், உரிமை தொகை எப்போது வழங்குவோம் என அறிவிக்க போகிறோம். இவ்வாறு ஸ்டாலின் பேசினார்.