அ.தி.மு.க., பொதுக்குழு வழக்கில் பழனிசாமிக்கு பச்சைக்கொடி!

புதுடில்லி 'அ.தி.மு.க.,வின் இடைக்கால பொதுச்செயலராக, முன்னாள் முதல்வர் பழனிசாமியை தேர்வு செய்ய, கடந்தாண்டு ஜூலை ௧௧ல் நடந்த பொதுக்குழு கூட்டம் செல்லும். பழனிசாமி இடைக்கால பொதுச்செயலராக தேர்வு செய்யப்பட்டதும் செல்லும்' என்ற, அதிரடி தீர்ப்பை நேற்று வழங்கியது உச்ச நீதிமன்றம். இதன் வாயிலாக, சென்னை உயர் நீதிமன்ற அமர்வின் தீர்ப்பு உறுதி செய்யப்பட்டுள்ளது.

அ.தி.மு.க., பொதுச் செயலராக இருந்த முன்னாள் முதல்வர் ஜெயலலிதா மறைவுக்கு பின், கட்சி இரண்டாகப் பிரிந்தது. பழனிசாமி தலைமையில் ஒரு பிரிவும், மற்றொரு முன்னாள் முதல்வர் பன்னீர்செல்வம் தலைமையில் மற்றொரு பிரிவும் செயல்பட்டு வந்தன.

பின், இரு தலைவர்கள் இடையே சமரசம் ஏற்பட்டு, ஒன்றாக இணைந்தனர். இதன்படி, கட்சியின் ஒருங்கிணைப்பாளராக பன்னீர்செல்வமும், துணை ஒருங்கிணைப்பாளராக பழனிசாமியும் பொறுப்பேற்றனர். கடந்தாண்டு கட்சியில் மீண்டும் பிளவு ஏற்பட்டது.

மேல் முறையீடு

இதையடுத்து, கடந்தாண்டு ஜூன் ௨௩ம் தேதி, அ.தி.மு.க., பொதுக்குழு கூட்டம் நடந்தது. அதில், கட்சியில் ஒற்றைத் தலைமை குறித்து விவாதிக்க, மற்றொரு பொதுக் குழுவை கூட்டுவதற்கான தீர்மானம் நிறைவேற்றப்பட்டது.

இதைத் தொடர்ந்து, ஜூலை ௧௧ம் தேதி பொதுக்குழு கூட்டம் நடத்தப்பட்டது. அதில், கட்சியின் இடைக்கால பொதுச் செயலராக பழனிசாமியை நியமிக்கும் தீர்மானம் நிறைவேற்றப்பட்டது. மேலும், பன்னீர்செல்வம் உள்ளிட்டோரை கட்சியில் இருந்து நீக்கும் தீர்மானமும் நிறைவேற்றப்பட்டது.

இதை எதிர்த்து பன்னீர்செல்வம் தரப்பில் தாக்கல் செய்யப்பட்ட வழக்கை, சென்னை உயர் நீதிமன்ற தனி நீதிபதி விசாரித்தார். கடந்தாண்டு ஆக., ௧௭ல் அளித்த தீர்ப்பில், 'பொதுக்குழு கூட்டம் நடத்தப்பட்டது செல்லாது' என, குறிப்பிடப்பட்டது.

இதை எதிர்த்து, பழனி சாமி தரப்பில் தாக்கல் செய்யப்பட்ட வழக்கை சென்னை உயர் நீதிமன்ற அமர்வு விசாரித்தது. கடந்தாண்டு செப்., ௨ல் பிறப்பித்த உத்தரவில், 'ஜூலை ௧௧ல் நடத்தப்பட்ட பொதுக்குழு கூட்டம் செல்லும்' என, தெரிவிக்கப்பட்டது.

இதை எதிர்த்து, பன்னீர்செல்வம் தரப்பில் உச்ச நீதிமன்றத்தில் மேல்முறையீடு செய்யப்பட்டது. இந்த வழக்கை விசாரித்த நீதிபதி தினேஷ் மகேஷ்வரி அடங்கிய அமர்வு, கடந்த மாதம் ஜன., ௧௧ல் தீர்ப்பை ஒத்தி வைத்தது.

இந்த வழக்கில் நேற்று உத்தரவு பிறப்பிக்கப்பட்டது. அந்த உத்தரவில் கூறப்பட்டுள்ளதாவது:

அ.தி.மு.க., பொதுக்குழுவை கூட்டுவது தொடர்பாக, கடந்தாண்டு ஜூலை ௬ல் உச்ச நீதிமன்றம் இடைக்கால உத்தரவு பிறப்பித்தது. அந்த உத்தரவில், பொதுக்குழுவை கூட்டலாம் என்று தெரிவிக்கப்பட்டது.

அந்த உத்தரவின்படி நடத்தப்பட்டதால், ஜூலை ௧௧ல் நடந்த பொதுக் குழு கூட்டம் செல்லும். எனவே, சென்னை உயர் நீதிமன்ற அமர்வு பிறப்பித்த உத்தரவை உறுதி செய்கிறோம்.

உரிய உத்தரவு

சென்னை உயர் நீதிமன்ற தனி நீதிபதி பிறப்பித்த உத்தரவு, தேர்தல் கமிஷனால் அங்கீகரிக்கப்பட்ட கட்சியான, அ.தி.மு.க.,விற்கு கடுமையான பாதிப்பை ஏற்படுத்தும் என்ற காரணத்தால், அதற்கு உயர் நீதிமன்ற அமர்வு தடை விதித்தது.

இதற்காக அமர்வு கூறியுள்ள காரணங்கள் மற்றும் வழக்கின் தன்மை ஏற்புடையதாக உள்ளது.கட்சியின் உயர்மட்ட அமைப்பாக பொதுக்குழு உள்ளது. இந்நிலையில் அந்தக் கூட்டம் நடத்தப்படுவது, அதில் எடுத்த முடிவுகளில் உத்தரவிடுவது, கட்சி விவகாரத்தில் தலையிடுவதாக அமைந்து விடும்.


கடந்தாண்டு ஜூலை ௧௧ல் நடந்த பொதுக்குழு கூட்டத்தில் எடுக்கப்பட்ட முடிவுகள், தீர்மானங்களை எதிர்க்கும் வழக்கு, சென்னை உயர் நீதிமன்றத்தில் நிலுவையில் உள்ளது. சட்டத்துக்கு உட்பட்டு, அந்த வழக்கில் உரிய உத்தரவுகளை பிறப்பிக்கலாம்.இவ்வாறு உச்ச நீதிமன்ற உத்தரவில் கூறப்பட்டுள்ளது.

.