ஆசை காட்டி மோசடி செய்யும் நிறுவனங்களில் முதலீடு கூடாது: டி.ஜி.பி.,

சென்னை: 'இரட்டிப்பு பணம் மற்றும் நிலம் தருவதாக, ஆசை காட்டி மோசடி செய்யும் நிறுவனங்களில், முதலீடு செய்ய வேண்டாம்' என, டி.ஜி.பி., சைலேந்திரபாபு எச்சரித்துள்ளார்.

திருச்சி மன்னார்புரத்தை சேர்ந்த 'எல்பின்' நிதி நிறுவனம், சென்னை, மதுரை, சிவகங்கை, ராமநாதபுரம், திருப்பூர் மற்றும் புதுச்சேரியில் செயல்பட்டு வந்தது. இந்நிறுவனத்தில் முதலீடு செய்தால், இரட்டிப்பு பணம் மற்றும் நிலம் தருவதாக ஆசை காட்டி மோசடி நடந்துள்ளது.

மேலும், இந்நிறுவனம் சார்பில், அறம் மக்கள் நல சங்கம் டிரஸ்ட், அறம் 'டிவி' சேனல், தமிழ் ராஜ்ஜியம் என்ற பத்திரிகை பெயரை பயன்படுத்தியும் பண மோசடி நடந்துள்ளது. இது தொடர்பாக, திருச்சி, தஞ்சாவூர், சிவகங்கை என, 10க்கும் மேற்பட்ட மாவட்டங்களில் வழக்குகள் பதிவு செய்யப்பட்டுஉள்ளன.

இந்த மோசடி தொடர்பாக, 'எல்பின்' நிறுவனத்தின் நிர்வாக இயக்குனர் ரமேஷ்குமார், 48, கைது செய்யப்பட்டு, சிறையில் அடைக்கப்பட்டு உள்ளார்.

மேலும், ரமேஷ்குமார் நடத்தி வந்த, 'இ - காம், மார்க்கெட் இந்தியா, வராகமணி, ஆர்.எம்.வெல்த் கிரியேஷன் உள்ளிட்ட வேறு சில நிறுவனங்களில் பொது மக்கள் முதலீடு செய்து ஏமாற வேண்டாம்' என, டி.ஜி.பி., சைலேந்திரபாபு எச்சரிக்கை விடுத்துள்ளார்.