கவர்னர் பதவியில் அரசியல் பேசக்கூடாது: இந்திய கம்யூ., ராஜா 

கோவை : ''கவர்னர் பதவியில் இருப்பவர்கள் தங்களின் கட்சி அரசியலை பேசக்கூடாது,'' என, இந்திய கம்யூ., பொதுச்செயலாளர் ராஜா கூறினார். கோவையில் ராஜா நிருபர்களிடம் கூறியதாவது: தேர்தலில் இடதுசாரி கட்சிகளுக்கு வீழ்ச்சி ஏற்பட்டு இருக்கலாம்.

ஆனால் அரசியல், கொள்கை நிலைகளில் உறுதியாக இருக்கிறோம். அதனால் தான், பிரதமர் மோடி, 'கம்யூனிசம் என்பது ஒரு அபாயமான சித்தாந்தம்' என்று சொல்கிறார். வரும், 2024ம் ஆண்டு லோக்சபா தேர்தலில் பா.ஜ.,வை வீழ்த்த வேண்டும் என்ற அரசியல் புரிதலோடு, மத சார்பற்ற ஜனநாயக கட்சிகள் ஒன்று படவேண்டும் என்பதுதான் இடதுசாரிகளின் நிலைப்பாடு.

மாநில கவர்னர்கள் நியமனங்கள் என்பது அரசியல் நியமனங்களாக மாறி வருகின்றன. ஜார்கண்ட் மாநில கவர்னராக ராதாகிருஷ்ணனை நியமனம் செய்து இருப்பதில் ஆச்சரியப்பட ஒன்றுமில்லை.

கவர்னர் பதவியில் இருப்பவர்கள் தங்களின் கட்சி அரசியலை பேசக்கூடாது. அது அரசியல் சட்டத்துக்கு எதிரானது.கருணாநிதி மக்களுக்காக சிந்தித்து எழுதிய தலைவர். அவரது பேனாவை நினைவு சின்னமாக வைப்பதில் தவறில்லை. இதை அரசியலாக பார்க்கக் கூடாது. இவ்வாறு, அவர் கூறினார்.