'ஓ.பி.சி., எனப்படும் இதர பிற்படுத்தப்பட்ட வகுப்பில், 'கிரீமி லேயர்' அல்லாதோரின் ஆண்டு வருமான வரம்பை, 8 லட்சம் ரூபாயில் இருந்து அதிகரிக்கும் திட்டம் இல்லை' என, மத்திய அரசு தெரிவித்தது.

கல்வி, வேலைவாய்ப்பு உள்ளிட்டவைகளில், இதர பிற்படுத்தப்பட்ட வகுப்பினருக்கு வழங்கப்படும் இட ஒதுக்கீடு, 'கிரீமி லேயர்' மற்றும், 'கிரீமி லேயர்' அல்லாதோர் என இரண்டு வகையாக பிரிக்கப்பட்டுள்ளன. ஆண்டுக்கு 8 லட்சம் ரூபாய்க்கு மேல் வருமானம் உள்ளவர்கள் கிரீமி லேயர் என்ற பிரிவுக்குள் வருகின்றனர். ஆண்டுக்கு 8 லட்சம் ரூபாய் வரை வருமானம் உள்ளோர் கிரீமி லேயர் அல்லாதோர் என்ற பிரிவில் அடங்குவர்.


இந்த வருமான வரையறை, 1993ல் நடைமுறைக்கு வந்தது. இதுவரை நான்கு முறை உயர்த்தப்பட்டுள்ளது.கிரீமி லேயர் அல்லாதோருக்கான ஆண்டு வருமான வரம்பு 8 லட்சம் ரூபாயில் இருந்து 12 லட்சம் ரூபாயாக உயர்த்தப்பட உள்ளதாக கூறப்பட்டது. இது குறித்து லோக்சபாவில் நேற்று கேள்வி எழுப்பப்பட்டது.இதற்கு பதில் அளித்த மத்திய சமூக நீதித்துறை அமைச்சர் வீரேந்திர குமார், ''கிரீமி லேயர் அல்லாதோருக்கான ஆண்டு வருமான வரம்பை, 8 லட்சம் ரூபாயில் இருந்து உயர்த்தும் திட்டம் இல்லை,'' என, தெரிவித்தார்.