பெரம்பலுார்:முதியோர் உதவி தொகையை நிறுத்தியது தான் திராவிட மாடல் அரசின் சாதனை என அரியலுார் பொதுக்கூட்டத்தில் அ.தி.மு.க., இடைக்கால பொது செயலர் இ.பி.எஸ்., தெரிவித்தார்.


அரியலுார் பஸ் ஸ்டாண்ட் அருகே உள்ள அண்ணாதுரை சிலை முன்பு நேற்று இரவு எம்.ஜி.ஆர்., பிறந்த நாள் விழா பொதுக்கூட்டம், அரியலுார் மாவட்ட செயலர் ராஜேந்திரன் தலைமையில் நடந்தது. கூட்டத்தில், அ.தி.மு.க., இடைக்கால பொது செயலர் எடப்பாடி பழனிசாமி கலந்து கொண்டு பேசியதாவது:

நாட்டு மக்களுக்காக உழைத்தவர் எம்.ஜி.ஆர்., ஜெயலலிதா. வீட்டு மக்களுக்காக உழைப்பவர்கள் கருணாநிதி, ஸ்டாலின். எம்.ஜி.ஆர்., ஜெயலலிதாவுக்கு அ.தி.மு.க.,வினரே வாரிசுகள். 20 மாத கால தி.மு.க., ஆட்சியில் மக்களுக்கு எந்த பயனும் இல்லை. அ.தி.மு.க., ஆட்சி மக்களுக்கு பொற்கால ஆட்சி. தி.மு.க., ஆட்சி ஸ்டாலின் குடும்பத்திற்கான ஆட்சி. தமிழகத்தில் பொம்மை முதல்வர் ஆட்சி நடத்துகிறார். திறமையற்ற முதல்வராக ஸ்டாலின் உள்ளார். அவரது குடும்பம் தான் பிழைத்துக் கொண்டிருக்கிறது. ஸ்டாலின் முதல்வர் இப்போ இன்னொருத்தர் முளைச்சிட்டார். யாரு உதயநிதி. ஸ்டாலின் தனது 20 மாத கால ஆட்சியில் தனது மகன் உதயநிதியை விளையாட்டு துறை அமைச்சராக்கி முடிசூட்டு விழாவை நடத்தி முடித்திருக்கிறார். திருச்சியை சேர்ந்த நேரு, உதயநிதியின் மகனையும் நாங்கள் ஏற்றுக்கொள்வோம் என்கிறார். தி.மு.க.,வில் உழைக்கிறவர்களுக்கு மரியாதை கிடையாது. கடை கோடி தொண்டனாக இருந்த நான் இன்று முதல்வராகி ஒரு கட்சியின் தலைமைக்கு வந்துள்ளேன். தி.மு.க.,வில் முடியுமா. வேறு எந்த கட்சியிலும் வர முடியாது.
தேர்தல் நேரத்தின்போது ஸ்டாலின் நாங்கள் ஆட்சிக்கு வந்தால் நீட் தேர்வு ரத்து செய்யப்படும் என பொய் வாக்குறுதி கொடுத்தார்.

நீட் தேர்வு ரத்து செய்யும் ரகசியம் தங்களுக்கு தெரியும் என உதயநிதி பொய் வாக்குறுதி கொடுத்தார். ஆனால், தற்போது, தமிழகத்தில் 20 மாத கால ஆட்சியில் நீட் தேர்வால் 15 மாணவர்கள் தற்கொலை செய்து கொண்டுள்ளனர். ஸ்டாலின் தேர்தல் நேரத்தில் ஒரு பேச்சு பேசுகிறார். தற்போது வேறு மாதிரியாக பேசிகிறார்.

தி.மு.க., ஆட்சியில் கமிஷன், கலெக்சன், கரப்ஷன் தான் நடைபெற்று வருகிறது. நல்ல கலெக்சன் கொடுக்கும் அமைச்சர்களே ஸ்டாலினுக்கு சிறந்த அமைச்சர்கள். கமிஷன், கலெக்சன், கரப்சன் மட்டுமே தி.மு.க., அரசின் ஒரே நோக்கம். அ.தி.மு.க., அரசு கொண்டு வந்த திட்டங்களை ஸ்டாலின் தற்போது ரிப்பன் வெட்டி திறந்து வைத்து வருகிறார். திராவிட மாடல் ஆட்சி என்று கூறி மக்களை ஏமாற்றாதீர்கள். 20 மாத கால ஆட்சியில் என்ன செய்து கிழித்தீர்கள். அ.தி.மு.க., ஆட்சியில் செயல்படுத்திய குடிமராமரத்து திட்டத்திற்கு தி.மு.க., ஆட்சி மூடு விழா கண்டுள்ளது.

அ.தி.மு.க., ஆட்சியில் கொண்டு வந்த அம்மா மினி கிளினிக் உள்ளிட்ட பல்வேறு மக்கள் நல திட்டங்கள் நிறுத்தப்பட்டுள்ளது. டெல்டா மாவட்டங்களை பாதுகாக்கப்பட்ட வேளாண் மண்டலமாக மாற்றியது அ.தி.மு.க., அரசின் சாதனை. கொரோனா காலத்தில் பணியாற்றிய செவிலியர்களை தி.மு.க., அரசு வஞ்சித்து விட்டது. ஊடகங்கள் நடுநிலையாக செயல்பட்டால் தி.மு.க., இருக்கும் இடம் தெரியாமல் காணாமல் போய்விடும்.

முதியோர் உதவி தொகையை நிறுத்தியது தான் திராவிட மாடல் அரசின் சாதனை. தி.மு.க., ஆட்சியில் கட்டுமான பொருட்களின் விலை இரண்டு மடங்கு உயர்ந்துள்ளது. சினிமா துறையிலும் உதயநிதி குடும்பத்தை சேர்ந்தவர்கள் நடத்தும் நிறுவனம், 120 படங்களை அடிமாட்டு விலைக்கு வாங்கி, கோடி கோடியாக சம்பாதிக்கின்றனர். அதில்தான் கருப்பு பணத்தை வெள்ளை பணமாக மாற்ற முடியும். இவ்வாறு அவர் பேசினார்.