இந்தியாவுடன் போர் தொடுத்து பாடம் கற்று கொண்டோம்: பாக்., பிரதமர்

இஸ்லாமாபாத்: இந்தியாவுடன் நடந்த போரில், பல பாடங்களை கற்று கொண்டோம் என பாகிஸ்தான் பிரதமர் ஷெபாஸ் ஷெரீப் கூறியுள்ளார்.

இது தொடர்பாக 'அல் அரேபியா' டிவி சேனலுக்கு அளித்த பேட்டி ஒன்றில் கூறியதாவது: பாகிஸ்தான் அமைதியையே விரும்புகிறது. நம்மிடம் பொறியாளர்கள், டாக்டர்கள் மற்றும் திறன் வாய்ந்த தொழிலாளர்கள் உள்ளனர். இந்த விலைமதிப்பற்ற சொத்துகளை முறையாக பயன்படுத்தி, வளர வேண்டும் என்பது எங்களது விருப்பம்.



அமைதியாக வாழ்ந்து வளர்ச்சி பெறுவதா அல்லது ஒருவருக்கு ஒருவர் சண்டையிட்டு நமது நேரத்தையும், வளத்தையும் வீணடிப்பதா என்பது நமது கைகளில் தான் உள்ளது. இந்தியாவுடன் 3 முறை போரில் ஈடுபட்டோம். அவை மூலம் மக்களுக்கு துயரம், வறுமை மற்றும் வேலைவாய்ப்பின்மை தான் கிடைத்தது. போரின் மூலம் பல பாடங்களை நாங்கள் கற்று கொண்டோம். அமைதியாக வாழ்ந்து, இந்தியாவுடன் உள்ள பிரச்னையை சுமூகமாக தீர்த்து கொள்ள விரும்புகிறேன்.

எங்கள் வளங்களை, வெடிகுண்டுகள் மற்றும் வெடிமருந்துகள் மூலம் வீணடிக்க விரும்பவில்லை. இரு நாடுகளும் அணு ஆயுத நாடுகள் தான். இரு நாட்டு ராணுவங்களிடம் பல அதிநவீன ஆயுதங்கள் உள்ளன. இரு நாடுகளுக்கும் இடையே போர் ஏற்பட்டால், மிகப்பெரிய இழப்பு ஏற்படும். யாராலும் உயிர் பிழைக்க முடியாது.

இந்தியாவுடன் அமைதியான உறவை விரும்புகிறோம். அப்போது தான் இரு நாடுகளும் வளர முடியும். இதற்கு காஷ்மீரில் நடக்கும் மனித உரிமை மீறலை தடுத்து நிறுத்த வேண்டும். அங்கு நடப்பதை அனுமதிக்க முடியாது. காஷ்மீரில் தாங்கள் செய்வதை இந்தியா நிறுத்தி கொள்ள வேண்டும். இவ்வாறு அவர் கூறினார்.