காலம் காலமாக திமுக.,வே பயன்படுத்தும் ‛தமிழகம்: திடீரென எதிர்ப்பது ஏன்?

சென்னை: நமது மாநிலத்தில் தற்போது ‛தமிழகம்', ‛தமிழ்நாடு' பிரச்னையைத் தான் பெரிதாக நினைக்கிறது திமுக அரசு. சமீபத்தில் நடந்த நிகழ்ச்சி ஒன்றில் கவர்னர், ‛தமிழ்நாடு என்பதற்கு பதிலாக தமிழகம் என்பதே சரி' எனப் பேசியிருந்தார்.

இதற்கு சட்டசபையில் திமுக கூட்டணி கட்சிகள் அனைத்தும் கவர்னருக்கு கண்டனம் தெரிவித்து கோஷம் எழுப்பி வெளிநடப்பும் செய்தன. திமுக.,வினரும் கவர்னரின் தமிழகம் கருத்துக்கு எதிர்நிலையிலேயே உள்ளனர். தமிழ்நாடு என்பதே சரி என விவாதித்தும் வருகின்றனர்.

இந்த விவகாரம் குறித்து முதல்வர் ஸ்டாலினின் மகனும், அமைச்சருமான உதயநிதி, ‛தமிழ்நாடு வெறும் பெயரல்ல, புவியியல், மொழியியல், அரசியல், பண்பாட்டின் தனித்துவ அடையாளம். பெரும் போராட்டத்திற்கு பின், தமிழ் நிலத்திற்கு பெயர் சூட்டினார் அண்ணாதுரை. அவர் வழியிலும், கருணாநிதி வழியிலும், தமிழ்நாட்டினை ஸ்டாலின் தலைமையிலான கட்சி அரணாக காத்து நிற்கும்' என கருத்து தெரிவித்திருந்தார்.

இப்படி தமிழ்நாடு தான் சரி என ஆணித்தரமாக பேசி வரும் திமுக.,வே பல இடங்களில் தமிழகம் என்ற வார்த்தையை தான் உபயோகித்திருந்தது உலகறிந்த விஷயம். அதை திமுக மறந்துவிட்டது தான் ஆச்சரியம்.

தி.மு.க., மகளிர் அணி செயலரும், எம்.பி.,யுமான கனிமொழி, 'பெண்ணை உயர்த்தும் பேராற்றல் திராவிட மாடல், தலைநிமிர்ந்த தமிழகம்' என, தன் சமூக வலைதள பக்கத்தில் பதிவிட்டிருந்தார். ஆங்கிலப் புத்தாண்டு அன்று, கருணாநிதி நினைவிடத்திலும், 'தலை நிமிர்ந்த தமிழகம்; மனங்குளிருது தினந்தினம்' என்ற வாசகத்துடன், மலர் அலங்காரம் செய்தனர்.