கெட்டிக்காரனின் பொய் எட்டு நாள்: நடிகர் சித்தார்த்தின் ஹிந்தி குட்டு ஒரே நாளில் உடைந்தது!

மதுரை: 'மதுரை விமான நிலையத்தில், ஹிந்தியில் பேசிய பாதுகாப்பு அதிகாரிகள், என் பெற்றோரை மன உளைச்சலுக்கு ஆளாக்கினர்' என, நடிகர் சித்தார்த், இல்லாத ஒன்றை இட்டுக் கட்டிப் பேசியது, ஒரே நாளில் வெளிச்சத்திற்கு வந்தது.


தற்போது சினிமாவில் அதிக வாய்ப்பின்றி வலம் வரும் நடிகர் சித்தார்த், அவ்வப்போது எதையாவது பேசி சர்ச்சையில் சிக்குவது வாடிக்கையாகி விட்டது. நேற்று முன்தினம், 'டுவிட்டர்' சமூக வலைதளத்தில் அவர் பதிவிட்ட கருத்தால், புதிய சர்ச்சை கிளம்பியது. அதில், அவர் குறிப்பிட்டிருந்ததாவது: கூட்டமே இல்லாத, மதுரை விமான நிலையத்திற்கு வந்த வயதான என் பெற்றோர், சி.ஐ.எஸ்.எப்., அதிகாரிகளால், 20 நிமிடங்கள் துன்புறுத்துதலுக்கு ஆளாகினர்; எங்களிடம், ஹிந்தியில் பேசினர். 'ஆங்கிலத்தில் பேசுங்கள்' என்று கூறியும் ஹிந்தியிலேயே பேசினர். அதற்கு எதிர்ப்பு தெரிவித்தபோது, 'இந்தியாவில் இப்படித் தான் இருக்கும்' என்றனர். மேலும், வேலையில்லாதவர்கள் எல்லாம் அதிகாரத்தை காட்டுகின்றனர். இவ்வாறு குறிப்பிட்டுஇருந்தார்.


இது தொடர்பாக, மதுரை விமான நிலைய அதிகாரிகள் கூறியதாவது: மதுரை விமான நிலையத்திற்கு அவரது குடும்பத்தினர், 10 பேர் வந்தனர். அவர்கள் கூறுவது போல, 20 நிமிடங்கள் அவர்களை காத்திருக்க செய்யவில்லை. அவர்கள் அனைவருக்கும், ஒன்பது நிமிடங்களில் 'செக்கிங்' முடிந்து விட்டது. சோதனை நேரத்தில் அவர்களிடம் பேசியது, தஞ்சாவூரைச் சேர்ந்த பெண் அதிகாரி தான். அந்த இடத்தில் ஆங்கிலம், மலையாளம், ஹிந்தி தெரிந்தவர்கள் உட்பட ஐந்து பேர் இருந்தனர். இதில் அப்பெண் அதிகாரி மட்டுமே, அவர்களிடம் தமிழில் பேசினார்.


சித்தார்த் முக கவசத்தை அகற்றிய பின், அவரை அடையாளம் கண்ட போது, 15 நொடிகள் பேசினார். அவரது குடும்பத்தைச் சேர்ந்தவர்கள் தமிழ், ஹிந்தி, தெலுங்கு என, பல மொழிகளில் பேசினர். அவரது குடும்பத்தினர் தெலுங்கில் பேசியபோது, அருகில் தெலுங்கு மொழி தெரிந்த எஸ்.ஐ., ஒருவர் தெலுங்கில் பதில் கூறினார். அவர்கள் கொண்டு வந்த பையில் நாணயங்கள், எலக்ட்ரானிக் பொருட்கள் இருந்ததால் அதற்கு கீழே இருக்கும் பொருட்கள் எதுவும் 'எக்ஸ்ரே'யில் தெரியாது. எனவே, வழக்கமான நடைமுறைப்படி அதை 'டிரே'யில் எடுத்து வைக்கும்படி கூறி 'ஸ்கேன்' செய்தனர்.


அப்போது, 'எங்களுடன் பாதுகாவலர் வரவில்லை என்பதால், எங்களை 'வச்சி' செய்கிறீர்களா?' என தமிழில் சித்தார்த் கேட்டார். அதற்கு 'இது, எங்கள் நடைமுறை. இதில் எங்களை குற்றம் சொல்லாதீர்கள்' என பாதுகாப்பு அதிகாரிகள் தெரிவித்தனர். அதற்கு பதிலளித்த அவர், 'பார்க்க வேண்டிய இடத்தில் பார்த்துக் கொள்கிறேன்' என்றார். ஒருபோதும் ஹிந்தி மொழி குறித்து அவர் எங்களிடம் கேட்கவில்லை; நாங்களும் மொழி பற்றி பேசவில்லை. பரிசோதனை முடிந்து சென்றவர், திரும்ப வந்து எங்களை போட்டோ எடுத்துச் சென்றார்.


மதுரை விமான நிலையத்தில் இதுபோன்ற பிரச்னைகள் வரக்கூடாது என்பதற்காகவே, பயணியரிடம் கலந்துரையாடும் வாய்ப்புள்ள எல்லா பகுதிகளிலும், தமிழ் தெரிந்த அதிகாரி ஒருவரை நியமித்துள்ளோம். எனவே, இதுபோன்ற பிரச்னை இதுவரை எழவில்லை. சம்பவம் அனைத்தும் கண்காணிப்பு கேமராவில் பதிவாகி உள்ளது. இது, நடந்தபோது சில விமான நிறுவன ஊழியர்களும் அப்பகுதியில் இருந்தனர். இதுகுறித்து உயரதிகாரிகளிடமும் விளக்கமளித்து விட்டோம். இவ்வாறு அவர் கூறினார்.