பொய்யிலே பிறந்து, பொய்யிலே வளர்ந்த சசிகலா: ஜெயக்குமார் கிண்டல்

சென்னை: பொய்யிலே பிறந்து, பொய்யிலே வளர்ந்தவர் சசிகலா என மாஜி அமைச்சர் ஜெயக்குமார் விமர்சனம் செய்துள்ளார்.

18ம் ஆண்டு சுனாமி நினைவு தினத்தையொட்டி, சென்னை காசிமேட்டில் முன்னாள் அமைச்சர் ஜெயக்குமார் அஞ்சலி செலுத்தினார்.

பின் அவர் செய்தியாளர்களுக்கு அளித்த பேட்டி: அதிமுகவை இணைக்க பேச்சு நடப்பதாக சசிகலா கூறுவது பொய். பொய்யிலே பிறந்து, பொய்யிலே வளர்ந்தவர் சசிகலா. அனுபவமும், திறமையும் இல்லாத அரசு என்பதற்கு அமைச்சர் எ.வ. வேலுவின் பேச்சே உதாரணம்.

புயலால் பாதிக்கப்பட்ட மக்களுக்கு 15 நாட்கள் கடந்த பின்னும் எந்த நிவாரணும் தரவில்லை. அதிமுக ஆட்சிக்காலத்தில் அனைத்து கார்டுகளுக்கு பொங்கல் பரிசு கொடுத்தோம். அப்போது முதல்வர் ஸ்டாலின் 5 ஆயிரம் ரூபாய் கொடுக்க வலியுறுத்தினார். இப்போது முதல்வர் ஸ்டாலின் ஆயிரம் ரூபாய் மட்டும் அறிவித்துள்ளார். கரும்பும் பரிசு தொகுப்பில் இடம் பெறவில்லை. இவ்வாறு அவர் பேசினார்.