தமிழகத்தில் பா.ஜ., தனித்து போட்டி?

சென்னை: தமிழக பா.ஜ., தலைவர் அண்ணாமலையின் பாத யாத்திரை திட்டத்திற்கு, பா.ஜ., தேசிய தலைமை ஆதரவு அளித்துள்ளது. இந்த யாத்திரையில், ஆந்திரா, தெலுங்கானா, கர்நாடகா மற்றும் கேரளாவைச் சேர்ந்த பா.ஜ., தொண்டர்களும் பங்கேற்க ஏற்பாடு செய்யப்பட்டு வருகிறதாம்.

அண்ணாமலையின் யாத்திரை, ஓராண்டு முழுக்க இரண்டு கட்டமாக நடைபெறுமாம். இதன் வாயிலாக, தமிழகத்தின் 234 சட்டசபை தொகுதிகளையும் 'விசிட்' செய்ய அண்ணாமலை திட்டமிட்டுள்ளார்.

தமிழகத்தில், பா.ஜ., தனித்து போட்டியிடவே இந்த முயற்சி என சொல்லப்படுகிறது. 'என் பாத யாத்திரைக்கு மக்கள் ஆதரவு எப்படி இருக்கிறது என்பதை பொறுத்து, 2024 லோக்சபா தேர்தலில் பா.ஜ., தனித்து போட்டியிட முடிவு செய்யலாம்' என கட்சி மேலிடத்தில், அண்ணாமலை சொல்லியிருக்கிறாராம்.

தி.மு.க.,விற்கு எதிராக அண்ணாமலை செய்யும் அதிரடி அரசியலுக்கு மக்கள் மத்தியில் வரவேற்பு உள்ளது என கட்சி மேலிடம் நம்புகிறது. இதற்கிடையே, அ.தி.மு.க., பிளவுபட்டுள்ள நிலையில், அதை ஒன்றிணைக்கவும் பா.ஜ., முயற்சி செய்து வருகிறது. ஆனால், முன்னாள் முதல்வர்கள் பழனிசாமியும், பன்னீர்செல்வமும் இணைவார்கள் என்பது சந்தேகமே. எனவே, வரும் லோக்சபா தேர்தலில் தனியாக போட்டியிட்டு, தங்கள் கட்சிக்கு எவ்வளவு ஆதரவு இருக்கிறது என்பதை தெரிந்து கொள்ள, பா.ஜ., தலைமை விரும்புகிறதாம். இதை வைத்து, 2026 தமிழக சட்டசபை தேர்தலில் எப்படி போட்டியிடுவது என்பதை பா.ஜ., முடிவு செய்யும்.

வரும் 2024 லோக்சபா தேர்தலில் தனித்து போட்டியிட வேண்டும் என்ற அண்ணாமலையின் திட்டத்திற்கு, பா.ஜ., மேலிடம் ஆதரவு அளித்துவிட்டதாம்.