லக்னோ: விருப்பத்திற்கு மாறாக வேறு சமூகத்தை சேர்ந்தவரை மகள் திருமணம் செய்து கொண்டதால் ஆத்திரம் தாங்காத தந்தை பெற்ற மகளை சுட்டுக்கொன்று சூட்கேசில் வைத்து வீசிய சம்பவம் நடந்துள்ளது.


உத்தர பிரதேசத்தின் யமுனா எக்ஸ்பிரஸ் சாலை பகுதியில் கடந்த 18-ம் தேதி அனாதையாக கிடந்த சூட்கேஸ் இருப்பதாக கிடைத்த தகவலையடுத்து மதுரா போலீசார் சூட்கேசை கைப்பற்றி திறந்து பார்த்த போது 22 வயது இளம் பெண் சடலம் இருந்துள்ளதும், தலையில் துப்பாக்கி குண்டு பாய்ந்ததற்கான காயம் இருந்தது.


இது குறித்து நடந்த விசாரணையில், பிணமாக கிடந்த பெண் ஆயுஷி சவுத்ரி ,22 என்பதும் இவரது தந்தை நித்தேஷ் சவுத்ரி என்பதும் தெரியவந்தது. நித்தேஷ் சவுத்ரி குடும்பத்திருடன் உத்தர பிரதேசத்தின் கோரக்பூர் நகரில் பலூனி என்ற பகுதியில் வசித்து வந்த போது மகள் திடீரென காணமால் போனதும் , பின்னர் வேறு சமூகத்தைச் சேர்ந்தவரை காதல் திருமணம் செய்து கொண்டதும் தெரியவந்தது.


மகளின் இந்த செயலால் ஆத்திரமடைந்த நித்தேஷ் சவுத்ரி கடந்த 18-ம் தேதி மகளின் நெற்றில் துப்பாக்கியை வைத்து சுட்டுக்கொன்றுவிட்டு பிணத்தை சூட்கேசில் வைத்து யமுனா எக்ஸ்பிரஸ் சாலையில் வீசி சென்றதும் விசாரணையில் தெரியவந்தது. இந்த கொலை சம்பவத்திற்கு தனது மனைவியையும் பயன்படுத்தியுள்ளதும் தெரியவந்தது. நித்தேஷ் சவுத்ரி, அவரது மனைவி ஆகிய இருவரையும் மதுரா போலீசார் கைது செய்து மாஜிஸ்திரேட் கோர்ட்டில் ஆஜர்படுத்தினர்.