பங்குச்சந்தையில் முதலீடு செய்யும் மக்கள்: பின்தங்கிய நிலையில் இந்தியா!

ஒரு நாட்டின் பொருளாதாரத்தை மேம்படுத்துவதில் பங்குச்சந்தைகளுக்கு முக்கிய இடமுண்டு. ஏராளமானோருக்கு வேலை வாய்ப்பு வழங்கவும், ஏற்றுமதி அதிகரிக்கவும், தொழில் வளர்ச்சிக்கும் நிறுவனங்களுக்கு நிதி தேவை. அந்த நிதியை பங்குச்சந்தை மூலம் பல நிறுவனங்கள் திரட்டுகின்றன. இதில் நாட்டு மக்களும் பங்களிப்பு செய்கின்றனர். நிறுவனம் வளரும் போது அதன் பலனை அவர்களும் பெறுகின்றன. அந்த வகையில் பங்குச்சந்தையில் எந்த நாட்டு மக்களின் பங்களிப்பு அதிகம் உள்ளது என பார்ப்போம்.

அமெரிக்கா - 55%

சமீபத்திய புள்ளிவிவரப்படி அமெரிக்க மக்கள்தொகையில் சுமார் 55 சதவீதம் குறைந்தபட்ச அளவாவது தங்களது முதலீடுகளை பங்குகளில் போட்டு வைத்துள்ளனர். அமெரிக்காவின் மக்கள் தொகை 33 கோடி. அதில் வருவாய் ஈட்டுபவர்கள், அதாவது 18 வயதுக்கு மேற்பட்டவர்கள் என பார்த்தால் 26 கோடி பேர் இதில் சுமார் 18 கோடி மக்கள் தங்கள் நாட்டின் பங்குச்சந்தையில் முதலீடு செய்து தொழில் வளர்ச்சிக்கு காரணமாக இருக்கின்றனர். அமெரிக்கா பணக்கார நாடாக இருக்க இதுவும் ஒரு காரணம்.

ஆஸ்திரேலியா - 40%

ஆஸ்திரேலியர்கள் சுமார் 40 சதவீதம் அநாட்டு பங்குச்சந்தையில் முதலீடு செய்வதை வழக்கமாக கொண்டுள்ளனர். ஆஸ்திரேலிய பங்குச்சந்தை அங்கு பழமையானது. ASX என்று இது அழைக்கப்படுகிறது.

பிரிட்டன் - 33%

பிரிட்டனின் மக்கள் தொகை சுமார் 7 கோடி. அதில் வருவாய் ஈட்டுபவர்கள் 5 கோடி பேர் இருக்கலாம். இவர்களில் 2 கோடிக்கும் அதிகமான மக்கள் தங்கள் முதலீடுகளை பங்குச்சந்தையில் மேற்கொள்கின்றனர்.

ஜப்பான் - 30%

வல்லரசு நாடான ஜப்பானின் மக்கள் தொகை சுமார் 12 கோடி. அதில் 30 சதவீதம் பேர் பங்குச்சந்தையில் முதலீடு செய்யும் பழக்கம் கொண்டவர்கள் என்கிறது புள்ளிவிவரம்.


கனடா - 25%
அமெரிக்காவின் அண்டை நாடான கனடாவும் கல்வியறிவு மற்றும் பொருளாதாரத்தில் முன்னேறிய சமூகத்தினை கொண்ட நாடு. இங்குள்ள 25% உள்நாட்டவர்கள் பங்குச்சந்தையில் முதலீடு செய்கின்றனர்.

சீனா - 13%

நாம் போட்டி நாடாக கருதக்கூடிய சீனாவின் மக்கள் தொகை 145 கோடி. கிட்டத்தட்ட நம் மக்கள் தொகைக்கு இணையானது. இதில் 18 கோடி பேர் அந்நாட்டு பங்குச்சந்தைகளில் முதலீடு செய்கின்றனர். அப்பணம் அவர்கள் நாட்டின் தொழில் நிறுவனங்களுக்கு செல்கிறது. அது பொருளாதாரம் மேம்பட பயன்படுகிறது.

இந்தியா - 7%

இந்தியாவின் மக்கள் தொகை 141 கோடி. இங்கு 10 கோடி டீமேட் கணக்குகள் உள்ளன. ஒருவரே எத்தனை டீமேட் கணக்குகள் வேண்டுமானாலும் தொடங்கலாம். அதனால் ஒரு 20 சதவீதம் கழித்தால் கூட சுமார் 8 கோடி பேர் பங்குச்சந்தைகளில் முதலீடு செய்கின்றனர். இது சீனாவுடன், அமெரிக்காவுடன் ஒப்பிடும் போது மிகக் குறைந்த அளவாகும்.

ஏன் தயக்கம்?

இந்தியாவைப் பொறுத்தவரை மஹாராஷ்டிரா, குஜராத், டில்லி ஆகிய 3 மாநிலங்களைச் சேர்ந்தவர்கள் தான் பங்குச்சந்தைகளில் பரவலாக முதலீடு செய்து வந்தனர். அனைத்தும் ஆன்லைன் மயமான பின்னர், டீமேட் கணக்கு தொடங்குவது, பணம் போடுவது, எடுப்பது எளிதானதால் தென்னிந்தியா உட்பட இந்தியாவில் பரவலாக இளைஞர்கள் பங்குச்சந்தை நோக்கி திரும்பியுள்ளனர். இதிலும் நீண்ட கால முதலீட்டாளர்கள் எண்ணிக்கை குறைவு. ஆப்ஷன்ஸ் டிரேடிங் செய்து கையை சுட்டுக்கொள்பவர்கள் தான் ஏராளம்.

நம் மக்களிடம் லட்ச ரூபாய்க்கு 15 சதவீத வட்டி தருகிறேன் என்றாலும், எப்படி அவ்வளவு தர முடியும் என்றெல்லாம் யோசிக்காமல், கண்ணை மூடிக்கொண்டு பணத்தை போடுவார்கள். முதல் முழுவதையும் இழந்து வருந்துவார்கள். ஆனால் பங்குச்சந்தை அப்படி கிடையாது. அறிவைப் பயன்படுத்தி பணம் சம்பாதிக்கும் இடம். முதல் குறையக் கூடிய ஆபத்து இருந்தாலும், சந்தை எப்படி இயங்குகிறது, நிறுவனப் பங்குகளின் விலை எந்தெந்த காரணங்களால் ஏற்றம் காணும், சரிவைக் காணும், தரமான நிறுவனத்தை கண்டறிவது எப்படி, பங்குவிலை நியாயமானதாக உள்ளதா என்பதைப் பற்றி எல்லாம் படித்து தெரிந்துகொண்டு, சந்தையின் போக்கை உணர்ந்துக் கொண்டால் கணிசமான லாபம் பார்க்கலாம்.