அமைச்சரையே கலங்கடித்த வசூல் ராணி!

''நானும் ஒரு வசூல் மேட்டர் சொல்லுதேன்... ஆனா இது தேர்தல் வசூல் வே...'' என்ற அண்ணாச்சியே தொடர்ந்தார்...

''வருகிற 2024 லோக்சபா தேர்தலுக்கு இன்னும் ஒன்றரை வருஷம் தாம்வே இருக்கு... தி.மு.க., - அ.தி.மு.க., - பா.ஜ., உள்ளிட்ட கட்சிகள், 'பூத்' கமிட்டி அமைப்பது, வாக்காளர் பட்டியலை சரி பார்ப்பதுன்னு பரபரன்னு வேலையில இறங்கிட்டு...

''தி.மு.க.,வினர் ஒருபடி மேல போயி, மக்களிடம் தேர்தல் நிதி வசூலிக்க முடிவு செய்துட்டாவளாம்... அதிக நன்கொடை வசூலிக்கும் மாவட்டத்துக்கு வழக்கம் போல பரிசுகள் வழங்க போறதா அறிவிச்சு, வேலையில் இறங்கிட்டாவ வே...'' என்றார் அண்ணாச்சி.

''என்ன ஒரு ஒத்துமை பார்த்தேளா... நான் சொல்லப்போறதும், 'வசூல்' சங்கதி தான் ஓய்...'' என, உரக்க சிரித்தார் குப்பண்ணா.

''சரி, அதையும் சொல்லுங்க கேப்போம்...'' என்றார் அந்தோணிசாமி.

''கோவை மாநகராட்சியில உசந்த பதவியில இருக்கற அந்த மக்கள் பிரதிநிதி, திடீர் அதிர்ஷ்டத்துல தான் அந்த பதவிக்கே வந்ததா, ஆளுங்கட்சிக்காரா சொல்றா... ஆரம்பத்துல, அமைதியின் உருவமா இருந்த அந்தம்மா, 'வசூல் வேட்டை'யில இப்ப சந்திரமுகியா மாறிண்டு வர்றாங்களாம் ஓய்...

''உள்ளாட்சித் துறையின், 'தலை'யான திருச்சிக்காரர், அந்தம்மா செலவுக்கு மாசம் 15 லட்சம் ரூபாய் சொளையா கொடுக்கறாராம்... ஆனா அது, 'பத்தல பத்தல'ன்னு பாடிண்டு இருக்கா...

''உதவி கமிஷனர், டவுன் பிளானிங் அதிகாரிகள், இன்ஜினியர்களை கூப்பிட்டு, 'ஆளுக்கு மாசம் 5 லட்சம் கொடுத்திடுங்கோ'ன்னு சொன்னதுல அவாள்லாம் ஆடிப்போயிட்டா...

''இது எல்லாத்தையும் விட, 'ஹைலைட்டா'ன விஷயம் என்னன்னா, முதல்வரிடம் கோள் சொல்லி, துறை அமைச்சரையே மாற்ற அந்தம்மா திட்டம் போட்டாராம் ஓய்...

''அதனால தான், மேயர், நிலைக்குழு மற்றும் கவுன்சிலுக்கு இருந்த அதிகாரங்களை கமிஷனருக்கு பிரிச்சு கொடுத்து சமீபத்துல அரசாணையே வெளியாச்சுன்னு சொல்றா... இப்படியே போனா, அந்தம்மா அஞ்சு வருஷத்தை தாண்டறதே கஷ்டம் தான் போலிருக்கு ஓய்...'' என்றார் குப்பண்ணா.

அரட்டை முடிய பெஞ்ச் கலைந்தது.