எல்லை தாண்டி வீரத்தை காட்டாதீர்கள்: தமிழிசைக்கு தி.மு.க., எச்சரிக்கை

'மைக் மேனியா'

தமிழக கவர்னர் ரவிக்கும், தி.மு.க., அரசுக்கும் இடையேயான மோதல் காரணமாக, அவரை பதவியை விட்டு நீக்க வேண்டும் என, அக்கட்சி கோரிக்கை விடுத்துள்ளது. இது தொடர்பாக கருத்து தெரிவித்த தமிழிசை,தமிழக கவர்னரை பதவி நீக்கம் செய்யக்கோரி, ஜனாதிபதியிடம் மனு அளிக்க இருப்பதை கண்டித்திருந்தார்.
சென்னையில் நடந்த விழாவில் பேசும்போது, 'யார் என்ன சொன்னாலும், தமிழகத்தில் நான் மூக்கை மட்டுமல்ல, தலையையும் நுழைப்பேன்' என்றார்.

இந்நிலையில்,தமிழிசையை கடுமையாக விமர்சித்து, தி.மு.க., நாளிதழில் நேற்று வெளியான கட்டுரை: பலருக்கு 'மைக் மேனியா' இன்னும் சிலருக்கு 'கேமரா மேனியா' என்பர். கேமராவில் முகத்தை காட்ட வேண்டும்; மைக்கில் பேச வேண்டும் எனும் மன வியாதி சிலருக்கு அதிகம் உண்டு.
அத்தகைய நிலைதமிழிசைக்கும் ஏற்பட்டுள்ளது. அவரை, கவர்னராக தெலுங்கானா அரசோ, மக்களோ மதிப்பதில்லை. அதனால், புதுச்சேரியில் தன் ஆட்சி அதிகாரத்தை செலுத்தி வருகிறார்.

புலம்பல்

தெலுங்கானாவில் வாயை திறக்க முடியவில்லை. கவர்னருக்குரிய மரியாதையை தெலுங்கானா அரசு தரவில்லை. கவர்னர் உரையாற்ற கூட அழைக்கவில்லை என, போகும் இடமெல்லாம் புலம்பி தீர்க்கிறார்.

தமிழிசையின் கதறலுக்கு மத்திய அரசு காது கொடுப்பதாக தெரியவில்லை. இதை அறியாமல், மத்திய அரசு தனக்கு பின்னால் இருப்பதாக கருதி, தமிழிசைபிதற்றுகிறார். தமிழகத்திற்கென கவர்னர் இருக்கும்போது, எல்லை தாண்டியும், எல்லை மீறியும் அடிக்கடி தமிழக விவகாரங்களில் தலையிடுகிறார்.

'வாரன்ட்' இன்றி ஆஜர்

இது, கவர்னர் ரவியை எவ்வளவு சங்கடப்படுத்தும் என்பதை எண்ணாமல், 'வாரன்ட்' இன்றி ஆஜராகி தன் அறியாமையை அவரே வெளிச்சம் போட்டு காட்டி வருகிறார்.
மைக்கும், கேமராவும் கிடைத்து விட்டால், 'இரும்புக்கரம், துரும்புக்கரம்' என, வீராவேசம் பேசுவதை நிறுத்திவிட்டு, ஆக்கப்பூர்வமாக கவர்னர்கள் செயல்பட வேண்டும்.

உங்களது எல்லை தெலுங்கானா. அங்கு பட்ட அடிக்கு, தமிழகத்தில் தமிழிசை வீரத்தை காட்டக் கூடாது. அவரது கூற்றுபடி மூக்கை, வாலை நீட்டுவதை நிறுத்திக் கொள்ள வேண்டும்.
இவ்வாறு அதில் கூறப்பட்டுள்ளது.