அ.தி.மு.க., - எம்.பி., சண்முகம் பேட்டி:

கடலுார் மாவட்டம், நெய்வேலியில், என்.எல்.சி., நிறுவனத்திற்கு நிலம் வழங்கிய, 21 கிராமங்களைச் சேர்ந்த பாதிக்கப்பட்ட மக்களுக்கு, மத்திய மற்றும் மாநில அரசு சார்பில் அளித்த வாக்குறுதிகள் நிறைவேற்றப்படவில்லை. ஏற்கனவே சுரங்கம், 1, 2 ஆகியவற்றுக்கு கைப்பற்றப்பட்ட நிலங்களுக்கு இழப்பீடு வழங்கவில்லை. தற்போது, மூன்றாவது சுரங்கத்திற்கு நிலம் கையகப்படுத்துவதாக அறிவித்துள்ளனர்.தமிழகத்தின் வளங்களை பயன்படுத்தும் என்.எல்.சி., நிர்வாகம், நிலம் வழங்கிய மக்களுக்கான உரிமையை பறித்துள்ளது.

விடுதலை சிறுத்தைகள் கட்சியின் தலைவர் திருமாவளவன் பேட்டி:

கோவை கார் குண்டு வெடிப்பு தொடர்பாக, அரசியல் ஆதாயம் தேடும் நோக்கில், தமிழக கவர்னர் ரவி, பா.ஜ.,வினர் செயல்படுவது அதிர்ச்சி அளிக்கிறது. தவறான தகவலை தி.மு.க., ஆட்சிக்கு எதிராக கவர்னரே சொல்கிறார் என்பது கூடுதல் அதிர்ச்சியாக உள்ளது. அவர், கவர்னர் என்ற பதவியை மறந்து ஆர்.எஸ்.எஸ்., தொண்டராக செயல்படுகிறார்; அரசு விழாக்களில் அரசியல் பேசுகிறார்; ஆன்மிகம் என்ற பெயரில் மதவாதம் பேசுகிறார்; திராவிட இயக்கங்களுக்கு எதிராக அவதுாறு பரப்புகிறார்.

பா.ம.க., தலைவர் அன்புமணி அறிக்கை:

குஜராத் மாநிலம், மோர்பி நகரில் ஆற்றின் குறுக்கே கட்டப்பட்டிருந்த தொங்கு பாலம் இடிந்து விழுந்ததில், 160-க்கும் மேற்பட்டோர் ஆற்றில் மூழ்கி உயிரிழந்திருப்பது வேதனை அளிக்கிறது. பொதுமக்கள் அதிக அளவில் பயன்படுத்தும், பாலங்கள் போன்ற கட்டமைப்புகள் இடிந்து விபத்துக்குள்ளாவதை தடுப்பதற்கான பாதுகாப்பு, 'புரோட்டோகால்'கள் உருவாக்கப்படுவதையும், அவை முழுமையாக கடைப்பிடிக்கப்படுவதையும் மத்திய, மாநில அரசுகள் உறுதி செய்ய வேண்டும்.

மனிதநேய மக்கள் கட்சி தலைவர் ஜவாஹிருல்லா அறிக்கை:

ஹரியானாவில் நடந்த, மாநில உள்துறை அமைச்சர்களின் மாநாட்டில் பேசிய பிரதமர் மோடி, 'நாடு முழுதும் காவல் துறைக்கு ஒரே சீருடை இருக்க வேண்டும்' என்று கூறியுள்ளார். இது, மாநிலங்களின் உரிமையை பறிக்கும் செயலாகும். இதற்கு தமிழகம் உள்ளிட்ட மாநில உரிமையை வலியுறுத்தும் மாநிலங்கள், எதிர்ப்பு தெரிவிக்க வேண்டும்.