புதுடில்லி: 'இன்போசிஸ்' நிறுவனம், அதன் ஊழியர்கள், பிற நிறுவனங்களில் பகுதி நேரப் பணியாளர்களாக பணியாற்ற, பச்சைக்கொடி காட்டி உள்ளது.

ஊழியர்கள், மேனேஜர்களின் அனுமதியுடன், பகுதி நேரப் பணிகளில் ஈடுபடலாம் என்றும், அந்த வேலைகள் நிறுவனத்துக்கு போட்டியானதாக இருக்கக்கூடாது என்றும் இன்போசிஸ் தெரிவித்து உள்ளது. அத்துடன், பகுதி நேரப் பணிகளில் எவ்வாறு ஈடுபடலாம்; ஈடுபடக்கூடாது என, சுற்றறிக்கையையும் வழங்கி உள்ளது.

இன்போசிஸ் நிறுவனத்தின் இந்த நடவடிக்கை குறித்து நிபுணர்கள் கூறுகையில், “இந்த நடவடிக்கை நிறுவனத்திற்கு பல சவால்களை எதிர்கொள்ள உதவக்கூடும். ஏனெனில், இது ஊழியர்கள் கூடுதல் வருவாய் பெற அனுமதிக்கிறது. “அத்துடன், சில கட்டுப்பாடுகள் இருந்தாலும், ஊழியர்களின் தொழில்நுட்ப ஆர்வத்தை தூண்டுவதாகவும் அமைகிறது,”என தெரிவிக்கின்றனர்.

தகவல் தொழில்நுட்பத் துறை ஊழியர்கள், தங்களுக்கான ஓய்வு நேரத்தில், வேறு பணிகளில் ஈடுபட்டு வருவாய் ஈட்டும் 'மூன்லைட்டிங்' எனும் நடைமுறை, அண்மைக் காலமாக விவாதப் பொருளாகி உள்ளது. பல நிறுவனங்கள் இதற்கு ஆதரவளிக்க மறுத்ததுடன், அப்படி பணிகளில் ஈடுபட்டவர்களை வேலை நீக்கமும் செய்து வருகின்றன.

இன்போசிஸ் நிறுவனமும், மூன்லைட்டிங் நடைமுறையை ஆதரிக்கவில்லை. மேலும், ஓராண்டுக்கும் மேலாக இரட்டை பணிகளில் இருந்தவர்களை பணிநீக்கமும் செய்துள்ளது. இந்நிலையில், தற்போது மேனேஜர்களின் அனுமதியுடன், பகுதி நேரப் பணிபுரியலாம் என தெரிவித்துள்ளது.