சென்னை : ''பொது இடங்களை ஆக்கிரமிப்பது ஒரு வியாதி. இது மக்கள் மத்தியில் வளரக் கூடாது. நீர்நிலை ஆக்ரமிப்புகள் அகற்றப்பட வேண்டும் என்பதில் மாற்று கருத்து கிடையாது,'' என, அமைச்சர் துரைமுருகன் ஆவேசமாக தெரிவித்தார்.

சட்டசபையில், கேள்வி நேரத்தில் நடந்த விவாதம்:

அ.தி.மு.க., - அய்யப்பன்: உசிலம்பட்டி தொகுதியில் உள்ள, 58 கிராம கால்வாயை, சிமென்ட் கால்வாயாக கட்டித் தர வேண்டும்.

அமைச்சர் துரைமுருகன்: இத்திட்டம், கருணாநிதி ஆட்சியில் உருவாக்கப்பட்டது. ஆனால், 25 ஆண்டுகளாக முழுமை பெறாமல் உள்ளது. உறுப்பினர் நல்ல யோசனை கூறி உள்ளார். நடவடிக்கை எடுக்கப்படும்.

துணை சபாநாயகர் பிச்சாண்டி: பெரும்பாலான ஏரிகளில் ஆக்கிரமிப்புகள் அகற்றப்படுகின்றன. ஆக்கிரமிப்புகள் அகற்றப்பட்ட பின், ஏரிகளுக்கு வேலி அமைத்தால், மீண்டும் ஆக்கிரமிப்பு வராமல் இருக்கும். வீடுகள் இடிக்கப்படும் சூழல் உள்ளது; அவர்களுக்கு விலக்கு அளிக்கப்படுமா? ஏரிகளை துார் வாரும்போது, ஏரி குறித்த விபரங்களை அறிய, அளவீட்டு கருவி அமைக்கப்படுமா?

துரைமுருகன்: ஏரிகளை துார் வாரவே படாதபாடு பட வேண்டி உள்ளது. வேலி அமைக்க நிதிக்கு எங்கு செல்வது? ஏரிகளை ஆக்கிரமித்து வீடு கட்டி உள்ளனர். அதை இடிக்கும்படி உச்ச நீதிமன்றம் உத்தரவிட்டுள்ளது. அதை நிறைவேற்றுவதா; பிச்சாண்டி கோரிக்கையை நிறைவேற்றுவதா என்று எனக்கு தெரியவில்லை.

பொது இடங்களை ஆக்கிரமிப்பது என்பது ஒரு வியாதி. இது மக்கள் மத்தியில் வளரக் கூடாது. குறிப்பாக, நீர் நிலைகளை ஆக்கிரமித்தவர்கள் கண்டிப்பாக அகற்றப்பட வேண்டும் என்பதில் மாற்று கருத்து கிடையாது. இவ்வாறு விவாதம் நடந்தது.