கோவை: கோவை மாநகரில் இயல்பு நிலை திரும்பியுள்ளதால், பாதுகாப்பு பணிக்காக வெளி மாவட்டங்களில் இருந்து வரவழைக்கப்பட்டிருந்த போலீசார், திருப்பி அனுப்பப்படுகின்றனர்.



கோவை மாநகரில், செப்.,22ம் தேதியும், 23ம் தேதியும் கெரசின் குண்டு வீச்சு மற்றும் பஸ் உடைப்பு சம்பவங்கள் நடந்தன. 6 இடங்களில் பெட்ரோல் குண்டுகள் வீசப்பட்டன. 2 அரசு பஸ்களில் கண்ணாடிகள் உடைக்கப்பட்டன. பதற்றம் நிலவியதால் போலீசார், அதிவிரைவு படையினர் மாநகரில் அணிவகுப்பு நடத்தினர்.

சட்டம் - ஒழுங்கு கூடுதல் டி.ஜி.பி., தாமரைக்கண்ணன் கோவைக்கு வந்து, பாதுகாப்பு ஏற்பாடுகளை மேற்பார்வையிட்டார். சம்பவம் நடந்த இடங்களில் இருந்து சேகரிக்கப்பட்ட 'சிசிடிவி' காட்சிப்பதிவுகள், உள்ளிட்ட ஆதாரங்கள் அடிப்படையில், பெட்ரோல் குண்டு வீச்சில் ஈடுபற்றதாக, எஸ்.டி.பி.ஐ., மற்றும் பி.எப்.ஐ., அமைப்பினர், 9 பேர் கைது செய்யப்பட்டுள்ளனர்.

இது குறித்து, போலீஸ் கமிஷனர் பாலகிருஷ்ணன் நேற்று கூறியதாவது:
கோவை மாநகரில் கடந்த மாதம் நடந்த சில அசம்பாவித சம்பவங்கள் காரணமாக, பாதுகாப்பு பணிக்காக வெளி மாவட்டங்களில் இருந்து போலீசார் வரவழைக்கப்பட்டிருந்தனர்.



தற்போது இயல்பு நிலை திரும்பி விட்டதால், வெளி மாவட்டங்களில் இருந்து வரவழைக்கப்பட்ட போலீசார், திருப்பி அனுப்பப்படுகின்றனர். கமாண்டோ படையினர் 100 பேர் உட்பட, 550 பேர் இதுவரை திருப்பி அனுப்பி வைக்கப்பட்டுள்ளனர். வரும் வாரங்களில் மற்றவர்களும், அவரவர் பணியிடத்துக்கு திருப்பி அனுப்பப்படுவர்.

கெரசின் குண்டு வீச்சு தொடர்பாக, இதுவரை கோவை மாநகரில் மட்டும் 9 பேர் கைது செய்யப்பட்டுள்ளனர். இன்னும் சிலரை தேடி வருகிறோம். ஒரு சம்பவத்தில் மட்டும் இன்னும் புலன் விசாரணை நடந்து வருகிறது. மற்ற வழக்குகளில் துப்பு துலங்கி விட்டது.
கைது செய்யப்பட்டு சிறையில் அடைக்கப்பட்டவர்களை, போலீஸ் காவலில் வைத்து விசாரணை நடத்த முடிவு செய்யப்பட்டுள்ளது. இதற்கான அனுமதி கோரி, போலீசார் கோர்ட்டில் மனு தாக்கல் செய்ய உள்ளனர்.



அவர்களிடம் விசாரணை நடத்தும் பட்சத்தில், பெட்ரோல் குண்டு வீச்சில் தொடர்புடைய மற்ற நபர்கள், இதில் நடந்த சதித்திட்டம் பற்றிய தகவல்கள் தெரிய வரும். கோவை மாநகரில் அமைதியை நல்ல முறையில் பராமரிக்கும் நோக்கத்துடன், பல்வேறு தரப்பினரும் பங்கேற்கும், மத நல்லிணக்க கூட்டம் நடத்த ஏற்பாடு செய்யப்பட்டு வருகிறது.
இவ்வாறு, கமிஷனர் தெரிவித்தார்.